ජල විදුලිය සැපයීමට ඇති තරම් ජලාශවල ජලය තිබියදී, ගල් අඟුරු මිල පහළ ගොස් තිබියදී, එමෙන්ම මෙරට දෛනික විදුලි පරිභෝජනය ගිගාවොට් පැය 41.05 සිට ගිගාවොට් පැය 35 දක්වා අඩු වී තිබියදී විදුලි බිල්පත වැඩි කිරීමට ආණ්ඩුවට කිසිදු සාධාරණ හේතුවක් නොමැති බව ජාතික නිදහස් පෙරමුණේ ජාතික සංවිධායක, පාර්ලිමේන්තු මන්ත්‍රී ජයන්ත සමරවීර මහතා පවසයි.
ඒ මහතා මේ බව පැවසුවේ ඊයේ (24) පිටකෝට්ටේ පිහිටි ජාතික නිදහස් පෙරමුණේ ප්‍රධාන කාර්යාලයේදී පැවැති මාධ්‍ය හමුවක් අමතමිනි.
එසේම රටේ ජනයා නොමරා මරන, රටේ කර්මාන්ත වසා දමන, ආයෝජකයන් රටින් පිටව යන මේ “විදුලි බිල වැඩි කිරීම” දැඩි පිළිකුලෙන් යුතුව හෙළා දකින බවත් මෙවැනි අවස්ථාවක මහජන උපයෝගීතා කොමිසම විදුලිබල මණ්ඩලය ඉදිරියේ කොන්ද නොනමා, මහජනයා ආරක්ෂා කිරීමට පියවර ගත යුතු බවත් හෙතෙම අවධාරණය කලේය.
විදුලි බිල්පත පිටපිටම තෙවතාවක් ඉහළ දමා ඇති බවත් මෙවර විදුලි බිල්පත ඉහළ දැමීමත් සමග මෙරට විශාලතම විදුලි පාරිභෝගිකයා වන ජල සම්පාදන හා ජලාපවහන මණ්ඩලය ජල බිල්පත දෙවන වරට වැඩි කිරීමට සූදානම්ව සිටින බවත් ඒ මහතා පෙන්වා දුන්නේය. මෙම තත්වය හමුවේ සියලු දේශපාලන පක්ෂ ඇතුළු සමාජ ක්‍රියාකාරී කණ්ඩායම් පක්ෂ, පාට, වාදභේද පසෙකලා “විදුලි බිල වහා අඩු කරනු!” යන සටන් පාඨය යටතේ ගොඩනඟනු ලබන ජනතා ව්‍යාපාරයක් ලෙස ආණ්ඩුවට දැඩි බලපෑමක් එල්ල කළ යුතු බව ද ඔහු අනාවරණ කලේය.
කිසිදු “හිතක් – පපුවක්” නොමැතිව ජාත්‍යන්තර මූල්‍ය අරමුදලේ යෝජනාව පරිදි සොරකම්, වංචා දූෂණ, කළමනාකරණ දෝෂ, අකාර්යක්ෂමතාව වැනි හේතු නිසා විදුලිබල මණ්ඩලයේ සිදුව තිබෙන පාඩුව පියවා ගැනීමට ආණ්ඩුව ජනතාව මත මහා විදුලි බිලක් පටවා ඇති බවට චෝදනා කළ ජනිපෙ ජාතික සංවිධායකවරයා, විදුලිබල මණ්ඩලය ද තම පාඩුව “හිඟන්නාගේ තුවාලයක්” බවට පත් කරගෙන පාඩුවට එකම පිළියම ලෙස විදුලි බිල ඉහළ දැමීම සිදු කරන බව ද පැවසීය.
විදුලිබල මණ්ඩලය පවසන ආකාරයට මෙරට විදුලි බල අවශ්‍යතාවෙන් සියයට 75ක් ජල විදුලිය මඟින් ද සුළං හා සූර්ය බල ශක්තියෙන් තවත් සියයට 13ක් ද සපුරා ගන්නා බැවින් ඉතිරි සියයට 17ක ප්‍රමාණය ද සමකය ආසන්නයේ පිහිටි, පැය 12ක් හොඳින් හිරු එළිය වැටෙන මේ රටේ සූර්ය බලශක්තියෙන් නිපදවාගත හැකි බව ද ඒ මහතා කීය. එසේම නියඟය පවතින සමයක සූර්ය බල ශක්තියෙන් විදුලිය උත්පාදනයට වැඩි බරක් තබමින් ද වැසි සහිත කාලවලදී ජල විදුලියට වැඩි බරක් තබමින් ද විදුලිය නිපදවීම නිසි පරිදි කළමනාකරණය කළහොත් එම ප්‍රභව දෙකෙන් පමණක් මෙරට විදුලි බල අවශ්‍යතාව සපුරා ගත නොහැකි මන්දැයි මෙහිදී සමරවීර මහතා බලධාරීන්ගෙන් දැඩි ලෙස ප්‍රශ්න කර සිටියේය.
නමුත් අද “සූර්ය බල විදුලි ව්‍යාපෘති” ආරම්භ කිරීමට විදුලිබල මණ්ඩලය බාධා කරන බවට අධිකරණය හමුවේ පවා තහවුරු වී තිබෙන බවත් සූර්ය බල විදුලි ව්‍යාපෘති ගණනාවක ටෙන්ඩර අනුමත වී තිබුණ ද ඒවාට අවස්ථාව නොදීම හේතුවෙන් ආයෝජකයන් අධෛර්යට පත්ව ඇති බවත් ඒ මහතා අනාවරණය කළේය.
විදුලිබල මණ්ඩලයේ නිලධාරී මාෆියාව, සූර්ය බල විදුලි ඒකකයකට මිලදී ගැනීමේ මිලක් පවා නියම නොකොට කල් මරන බවත් සූර්ය බල විදුලි ව්‍යාපෘති ආරම්භ වූ පසු පෞද්ගලික අංශයේ විදුලි බලාගාරවලින් වැඩි මිලට විදුලිය මිලදී ගනිමින් ඔවුන්ට “කොමිස් ගිලීමට” නොහැකි වීම ඊට හේතුව බවත් සමරවීර මහතා වැඩිදුරටත් අනාවරණය කළේය.
මෙවැනි විකල්ප පිළිතුරු තුළින් විදුලි ඒකකයක් අඩු මිලට නිපදවමින් විදුලි බිල අඩු කිරීම මෙවැනි ආණ්ඩු තුළින් බලාපොරොත්තු විය නොහැකි බව ද ඒ මහතා සඳහන් කළේය.
