මැගසින් බන්ධනාගාරගත රැඳවූවකුගේ ඥාතියකුට අයත් බව කියන ජංගම දුරකතන අලෙවිසලකින් ජංගම දුරකතන 10ක් ලබා ගෙන ඉන් දුරකතන හයක් අදාළ රැඳවූවාට ලබා දී ඔහුගේ ඥාතීන් සමග ද දුරකතනයෙන් සබඳතා පැවැත්වූ බව කියන මැගසින් බන්ධනාගාර ප්‍රධාන ජේලර්වරයාගේ හා එහි ගබඩා භාරකාර නියාමකවරයකුගේ සේවය බන්ධනාගාර දෙපාර්තමේන්තුව මගින් වහා ම ක්‍රියාත්මක වන පරිදි ඊයේ (නොවැ. 5) සිට අත්හිටුවා තිබේ.
සිද්ධිය සම්බන්ධයෙන් ත්‍රස්ත විමර්ශන කොට්ඨාසය බන්ධනාගාර දෙපාර්තමේන්තුවට කරන ලද දැනුම් දීමකට අනුව ඔවුන්ගේ සේවය එසේ තහනම් කර ඇත.
පසුගිය දිනක මැගසින් බන්ධනාගාරය තුළ සිදුකළ හදිසි සෝදිසියකදී එහි රඳවා සිටින සැකකරුවන් සඟවා ගෙන තිබූ ජංගම දුරකතන කිහිපයක් බන්ධනාගාර බුද්ධි අංශය විසින් අත්අඩංගුවට ගෙන ඇති බව ත් එසේ අත්අඩංගුවට ගෙන ඇති ජංගම දුරකතන පිළිබඳව වැඩිදුර විමර්ශනය කිරීම සඳහා බන්ධනාගාර දෙපාර්තමේන්තුව මගින් එම දුරකතන රාජ්‍ය බුද්ධි සේවාවන් වෙත ලබා දී ඇති බව ද දැන ගැනීමට තිබේ.
එම දුරකතන මැගසින් බන්ධනාගාරයේ රඳවා සිටින රැඳවූවා අතට පත් වූයේ කෙසේ ද? යන්න පිළිබඳව අදාළ බුද්ධි සේවාවන් මගින් දීර්ඝ වශයෙන් විමර්ශනය කර ඇති බව ත් ඉහත සඳහන් ගබඩා පාලක නියාමකවරයා විසින් එම බන්ධනාගාරයේ රඳවා සිටින රැඳවූවකුගේ ඥාතියකුට අයත් දුරකතන අලෙවිසලකින් එම දුරකතන ලබා ගෙන ඇති බවට එම බුද්ධි අංශ හෙළි කර ගෙන ඇති බව ද දැන ගැනීමට ඇත.
අදාළ සැකකරු සතුව තිබී අත්අඩංගුවට ගත් දුරකතනවලින් ඉහත සඳහන් ජේලර්වරයා හා ගබඩා පාලක නියාමකවරයා සැකකාර පුද්ගලයාගේ ඥාතීන් සමග අදහස් හුවමාරු කර ගෙන ඇති බවට එම බුද්ධි අංශ අනාවරණය කර ගැනීමෙන් අනතුරුව ඒ පිළිබඳව බන්ධනාගාර දෙපාර්තමේන්තුව වෙත දැනුම් දී ඇති බව ද දැනගැනීමට තිබේ.
රාජ්‍ය බුද්ධි සේවාවන් මගින් ලබා දී තිබෙන තොරතුරු අනුව බන්ධනාගාර දෙපාර්තමේන්තුව මගින් එම ජේලර්වරයාගේ හා ගබඩා පාලක නියාමකවරයාගේ සේවය එසේ තහනම් කර ඇත.
මෙම සිද්ධිය සම්බන්ධයෙන් බන්ධනාගාර මාධ්‍ය ප්‍රකාශක කොමසාරිස් ගාමිණී බී. දිසානායක මහතාගෙන් ද කළ විමසීමකදී ඒ මහතා කියා සිටියේ, ජංගම දුරකතනවලින් සැකකරුවන්ගේ ඥාතීන් සමග සබඳතා පැවැත්වීම ඇතුළු කාරණා කිහිපයක් සම්බන්ධයෙන් සිදු කරන ලද විමර්ශනවලට යටත්ව එම නිලධාරීන් දෙදෙනාගේ සේවය අත්හිටුවා ඇති බව ත් බන්ධනාගාර කොමසාරිස්වරයකුගේ මෙහෙයවීම යටතේ සිද්ධිය සම්බන්ධයෙන් විධිමත් විමර්ශනයක් ආරම්භ කර ඇති බව ත් ය.
