නව ප්‍රජාතන්ත්‍රවාදී පෙරමුණේ ජාතික ලැයිස්තු ආසනයෙන් මෙවර පාර්ලිමේන්තුව සඳහා ද එක්සත් ජාතික පක්ෂයේ නායක රනිල් වික්‍රමසිංහ පැමිණිමට නියමිත බව වාර්තා වේ.
ඒ අනුව, මෙවර මැතිවරණයෙන් ජන්ද 500,835ක් ලබා ගෙන ආසන 3ක් සහ ජාතික ලැයිස්තු මන්ත්‍රී ධූර 2ක් ලබා ගත් නව ප්‍රජාතන්ත්‍රවාදී පෙරමුණේ පාර්ලිමේන්තු මන්ත්‍රී ධූරයක් ලබා ගන්නා අයෙකු ඉල්ලා අස්වීමට නියමිත බව ද එම සන්ධානයේ අභ්‍යන්තර ආරංචි මාර්ග සඳහන් කළේ ය.
මෙලෙස පාර්ලිමේන්තු මන්ත්‍රී ධූරයේ දිවුරුම් ලබා දීමෙන් අනතුරුව එක් මන්ත්‍රීවරයෙක් ඉල්ලා අස්වීමෙන් අනතුරුව පුරප්පාඩු වන මන්ත්‍රී ධූරය සඳහා එක්සත් ජාතික පක්ෂයේ නායක රනිල් වික්‍රමසිංහ පැමිණීමට නියමිත බව එහි ජ්‍යෙෂ්ඨ සමාජිකයෙක් පැවසීය.
ඒ අනුව, නව ප්‍රජාතන්ත්‍රවාදී පෙරමුණේ ජාතික ලැයිස්තු ආසනය සඳහා මෙවර මැතිවරණයට ඉදිරිපත් නොවුණු, ජාතික ලැයිස්තුවේ නොසිටිය එක්සත් ජාතික පක්ෂයේ නායක රනිල් වික්‍රමසිංහ නැවත පාර්ලිමේන්තුවට පැමිණීමට නියමිත බව ද ඔහු සඳහන් කළේ ය.
රට යම් කිසි අයුරකින් නැවැත අර්බුදකාරී තත්ත්වයකට පත්වුවහොත් රට බේරා ගැනීමට පාර්ලිමේන්තුව තුළ අත්දැකීම් සහිත නායකයෙකු සිටිය යුතු බැවින් මෙම තීරණය ගැනීමට නියමිත බව ද ඔහු වැඩිදුරට ත් පැවසුවේය.
[mawbima]
