ශ්රී ලංකාවේ සෑම පුද්ගලයෙකුටම අධිවේගී අන්තර්ජාල (High-Speed Broadband) සබඳතාවක් ලබා දීමේ ඉලක්කය 2029 වසර වන විට සපුරා ගැනීමට සැලසුම් කර ඇති බව ඩිජිටල් ආර්ථික අමාත්යාංශය නිවේදනය කරයි. විද්යා, තාක්ෂණය සහ ඩිජිටල් පරිණාමනය පිළිබඳ ආංශික අධීක්ෂණ කාරක සභාවේදී ජනාධිපති උපදේශක ආචාර්ය හාන්ස් විජේසූරිය මහතා මේ බව අනාවරණය කළේය.
සැලසුමේ ප්රධාන කරුණු:
රටේ දැනට 98%ක අන්තර්ජාල ආවරණයක් පැවතියද, එය අධිවේගී අන්තර්ජාල අවශ්යතාවට සරිලන මට්ටමක නොමැති බව මෙහිදී පෙන්වා දෙන ලදී. එම නිසා, පවතින ධාරිතාව 25%කින් වැඩි කිරීමට පියවර ගන්නා අතර, එහි පළමු පියවර ලෙස මෙම වසර තුළ පමණක් අලුතින් දුරකථන සබඳතා කුළුණු 100ක් ස්ථාපනය කිරීමට නියමිතය. සමස්ත ජාතික අවශ්යතාව සපුරාලීම සඳහා ඉදිරියේදී දුරකථන කුළුණු 600ත් 1000ත් අතර ප්රමාණයක් පියවරෙන් පියවර ඉදිකිරීමට රජය අපේක්ෂා කරයි.
මෙම ව්යාපෘතිය සඳහා පෞද්ගලික අංශයේ දායකත්වය ලබා ගැනීමට වාණිජ මොඩලයක් සකස් කරන අතර, කුළුණු ඉදිකිරීම සඳහා ලංසු ඉදිරිපත් කිරීමට ඔවුන්ට අවස්ථාව ලබා දෙනු ඇත. තාක්ෂණික දියුණුවට සමගාමීව කොළඹින් බැහැර ප්රදේශවල ජනතාවගේ ඩිජිටල් සාක්ෂරතාව වර්ධනය කිරීම වෙනුවෙන් දිස්ත්රික් ලේකම් කාර්යාල හරහා විශේෂ වැඩසටහන් ක්රියාත්මක කිරීමට ද කාරක සභාවේ අවධානය යොමු විය.
