ජර්මනියේ රෝහල් පද්ධතිය තුළ මේ වන විට හෙදියන් 30,000ත් 40,000ත් අතර ප්රමාණයක දැඩි හිඟයක් පවතින බව විදෙස් මාධ්ය වාර්තා කරයි. එරට ජනගහනය වේගයෙන් වයස්ගත වීමත් සමඟ ඉදිරියේදී මෙම තත්ත්වය තවත් බරපතළ විය හැකි බවට පුරෝකථනය කර ඇත. මෙම හිඟය පියවා ගැනීම සඳහා ජර්මනිය වැඩි වශයෙන් විදේශීය ශ්රමිකයන් මත යැපීමට පටන් ගෙන ඇති අතර මෑත වසරවල සෞඛ්ය ක්ෂේත්රයේ රැකියා වර්ධනය බොහෝ දුරට සිදුව ඇත්තේ විදේශිකයන්ගේ පැමිණීම මත බව වාර්තා වේ.
අතීතයේදී පෝලන්තය, තුර්කිය සහ රුමේනියාව වැනි නැගෙනහිර යුරෝපීය රටවලින් හෙදියන් බඳවා ගැනීමට ජර්මනිය කටයුතු කළද දැන් එම රටා වෙනස් වෙමින් පවතී. හැන්සියාටික් කනෙක්ට් හි කළමනාකාර අධ්යක්ෂ තෝමස් අවිසුස් පවසන පරිදි, වර්තමානය වන විට ඉන්දියාව සහ ඉන්දුනීසියාව වැනි ආසියානු රටවල් ජර්මනියේ හෙද සේවය සඳහා ප්රධාන මූලාශ්ර වෙළඳපොළවල් බවට පත්වෙමින් තිබේ.
ජර්මනියේ සේවය කරන හෙදියකට බදු සහ රක්ෂණ ගාස්තු අය කිරීමට පෙර මසකට යුරෝ 4,000ක පමණ ආකර්ෂණීය වැටුපක් හිමිවන අතර එය ආසියානු රටවල සාමාන්ය වැටුප් මට්ටමට වඩා සැලකිය යුතු ලෙස ඉහළ අගයකි. විශේෂත්වය වන්නේ “සේවායෝජකයා ගෙවයි” (Employer Pays) යන මූලධර්මය යටතේ හෙදියන් බඳවා ගැනීමේදී වැය වන යුරෝ 8,000 සිට 18,000 දක්වා වූ අධික පිරිවැය සෞඛ්ය සේවා ආයතන විසින්ම දරනු ලැබීමයි.
