ජපාන ආර්ථික, වෙළෙඳ සහ කර්මාන්ත අමාත්යාංශයේ (METI) උප අමාත්ය තකේහිකෝ මත්සුවෝ මහතා ඇතුළු 40 දෙනෙකුගෙන් යුත් ප්රබල දූත පිරිසක් ඊයේ (17) වෙළෙඳ අමාත්ය වසන්ත සමරසිංහ මහතා හමුවී ද්විපාර්ශ්වික සාකච්ඡා පැවැත්වූහ. ජපාන රජයේ නියෝජිතයන් මෙන්ම ප්රමුඛ පෙළේ පෞද්ගලික සමාගම් රැසක විධායක නිලධාරීන් ද මෙම කණ්ඩායමට ඇතුළත් විය.
ශ්රී ලංකාවේ ආර්ථික වර්ධනය සඳහා කෘෂිකර්මාන්තය, නිෂ්පාදන කර්මාන්ත, සංචාරක සහ සමුද්රීය ක්ෂේත්ර සඳහා ගුණාත්මක විදේශ ආයෝජන ලබා ගැනීම රජයේ ප්රමුඛතාවය බව අමාත්යවරයා මෙහිදී අවධාරණය කළේය. ශ්රී ලංකාව විශ්වාසදායක ආයෝජන ගමනාන්තයක් ලෙස සලකා කටයුතු කරන ලෙස ඔහු ජපාන ආයෝජකයින්ට ආරාධනා කර සිටියේය.
ශ්රී ලංකාවේ අපනයන විවිධාංගීකරණය කිරීම සඳහා යෝජිත “අපනයන අභිමුඛ කර්මාන්ත කොරිඩෝවක්” (Export-Oriented Industrial Corridor) ගොඩනැගීමේ වැදගත්කම ජපාන උප අමාත්යවරයා පෙන්වා දුන්නේය. ශ්රී ලංකාවේ භූගෝලීය පිහිටීම සහ දක්ෂ ශ්රම බලකාය ජපාන ආයෝජකයන්ට තවමත් ඉතා ආකර්ෂණීය සාධක බව ඔහු වැඩිදුරටත් පැවසීය.
ජපාන සමාගම් ශ්රී ලංකාවේ ආයෝජනය කිරීමේදී මුහුණ දෙන ගැටලු සහ ඔවුන්ගේ අපේක්ෂාවන් පිළිබඳව ද මෙහිදී දීර්ඝව සාකච්ඡා කෙරිණි. දූත පිරිසට ජපාන තානාපති ඉසොමතා අකියෝ මහතා ද එක්ව සිටි අතර, ශ්රී ලංකාව නියෝජනය කරමින් අමාත්යාංශ ලේකම් කේ. ඒ. විමලේන්තිරරාජා මහතා ඇතුළු නිලධාරීන් පිරිසක් සහභාගී වූහ.
පසුගිය කාලසීමාවේ අත්හිටුවා තිබූ ජපාන ආධාර ව්යාපෘති යළි ආරම්භ වීමත් සමඟ මෙවැනි විශාල දූත පිරිසක් පැමිණීම දෙරටේ ආර්ථික සබඳතාවල නව පිම්මක් ලෙස විචාරකයෝ හඳුන්වති.
