පාකිස්ථානයේ ISI ඔත්තු සේවා සහ බංග්ලාදේශ අන්තවාදී කණ්ඩායම්වල සහාය ඇතිව මහා පරිමාණ ත්රස්ත ප්රහාරයක් එල්ල කිරීමට සැලසුම් කළ බවට සැක කෙරෙන පුද්ගලයන් හය දෙනෙකු තමිල්නාඩුවේදී අත්අඩංගුවට ගෙන තිබේ. දිල්ලි පොලිසිය විසින් සිදු කළ විශේෂ මෙහෙයුමකදී මොවුන් කොටු කරගෙන ඇති අතර, අත්අඩංගුවට ගත් පිරිස අතර බංග්ලාදේශ ජාතිකයෙකු ද වන බව වාර්තා වේ. වැඩිදුර විමර්ශන කටයුතු සඳහා සැකකරුවන් නවදිල්ලිය වෙත රැගෙන යාමට කටයුතු කරමින් පවතින බව පොලිස් ආරංචි මාර්ග සඳහන් කරයි.
සැකකරුවන් සන්තකයේ තිබී ජංගම දුරකථන සහ සිම් කාඩ්පත් (SIM cards) විශාල ප්රමාණයක් පොලිස් භාරයට ගෙන ඇති අතර, මේ හරහා ඔවුන්ගේ සබඳතා ජාලය පිළිබඳ තොරතුරු රැසක් අනාවරණය කර ගැනීමට හැකිවනු ඇතැයි විමර්ශන කණ්ඩායම් විශ්වාසය පළ කරති. දකුණු ඉන්දියාව ඉලක්ක කරගනිමින් මෙවැනි ප්රබල ත්රස්ත කුමන්ත්රණයක් දියත් කිරීමට ගත් උත්සාහය සම්බන්ධයෙන් ඉන්දීය බුද්ධි අංශ දැඩි අවධානයෙන් පසුවේ.
