ගල්ෆ් කලාපයේ හටගෙන ඇති යුදමය වාතාවරණය හමුවේ ලෝක වෙළඳපොළේ බොරතෙල් මිල ශීඝ්රයෙන් ඉහළ යාම වැළැක්වීම සඳහා සිය හදිසි තෙල් සංචිත (Emergency oil reserves) නිදහස් කිරීම පිළිබඳව G7 රටවල මුදල් අමාත්යවරුන් අද (09) විශේෂ සාකච්ඡාවක නිරත වීමට නියමිතය. ජාත්යන්තර බලශක්ති ඒජන්සියේ (IEA) සම්බන්ධීකරණයෙන් සිදුවන මෙම හදිසි හමුව නිව්යෝර්ක් වේලාවෙන් අද පෙවරු 8:30ට පැවැත්වීමට සැලසුම් කර ඇති බව වාර්තා වේ.
ඉරානය සමඟ පවතින ගැටුම්කාරී තත්ත්වය හේතුවෙන් පසුගිය සතිය තුළ ලෝක වෙළඳපොළේ තෙල් මිල වාර්තාගත ලෙස ඉහළ ගිය අතර, බ්රෙන්ට් (Brent) බොරතෙල් බැරලයක මිල අද දිනයේ ඩොලර් 116.71 දක්වා සියයට 24කින් ඉහළ ගොස් තිබුණි. මෙම තත්ත්වය හමුවේ ලොව පුරා උද්ධමනය ඉහළ යාමේ සහ ආර්ථික වර්ධනය අඩාල වීමේ බරපතල තර්ජනයක් මතුව ඇති බැවින්, හදිසි සංචිතවල පවතින බැරල් මිලියන 300ත් 400ත් අතර ප්රමාණයක් වෙළඳපොළට මුදාහැරීමට ඇමරිකාව ඇතුළු රටවල් කිහිපයක් යෝජනා කර ඇත.
ඇමරිකානු ජනාධිපති ඩොනල්ඩ් ට්රම්ප් මහතාට ද එරට ඉන්ධන මිල ඉහළ යාම හමුවේ දැඩි දේශපාලන පීඩනයක් එල්ල වී තිබේ. පසුගිය සතියේ ඇමරිකාවේ පෙට්රල් ගැලුමක මිල ඩොලර් 2.98 සිට 3.45 දක්වා ඉහළ ගොස් ඇත. කෙසේ වෙතත්, ට්රම්ප් මහතා සිය ‘Truth Social’ ගිණුමෙහි සටහනක් තබමින් ප්රකාශ කර ඇත්තේ ඉරාන න්යෂ්ටික තර්ජනය විනාශ කිරීමෙන් පසු තෙල් මිල වේගයෙන් පහත වැටෙනු ඇති බවත්, ලෝක සාමය වෙනුවෙන් මෙය ගෙවිය යුතු කුඩා මිලක් බවත්ය.
චීනය, ඉන්දියාව, ජපානය සහ ජර්මනිය වැනි ප්රධාන තෙල් ආනයන රටවල් මෙම මිල ඉහළ යාම හමුවේ දැඩි අසීරුතාවයට පත්ව සිටින අතර, අද දින ආසියානු කොටස් වෙළඳපොළවල් ද විශාල ලෙස පහත වැටී තිබේ. IEA සංවිධානය සතුව දැනට බැරල් බිලියන 1.24ක පමණ හදිසි තෙල් සංචිත පවතින අතර, මෙම සංචිත නිදහස් කිරීම හරහා වෙළඳපොළ ස්ථාවර කිරීමට හැකි වනු ඇතැයි බලශක්ති විශ්ලේෂකයෝ අපේක්ෂා කරති.
