ඇමෙරිකා-ඉරාන ගැටුම සම්බන්ධයෙන් පච්චිලෙයිපල්ලි ප්රාදේශීය සභාව විසින් සම්මත කර ඇති බව කියන යෝජනාව සම්බන්ධයෙන් ඉලංගෙයි තමිල් අරසු පක්ෂයේ (ITAK) කිසිදු සම්බන්ධයක් නොමැති බවත්, එය පක්ෂයේ ප්රතිපත්තිවලට පටහැනි බවත් එහි ප්රධාන ලේකම් එම්.ඒ. සුමන්තිරන් මහතා අවධාරණය කරයි. සමාජ මාධ්ය ඔස්සේ ප්රකාශයක් නිකුත් කරමින් ඔහු පෙන්වා දෙන්නේ මෙම ක්රියාවට පක්ෂයේ හෝ එහි නායකත්වයේ කිසිදු දායකත්වයක් නොමැති අතර, පක්ෂයේ බලපෑම යටතේ පවතින සභා සභාපතිවරුන්ට මෙවැනි ක්රියාවල නිරත නොවන ලෙස දැනටමත් උපදෙස් දී ඇති බවයි.
ජාත්යන්තර කටයුතු පිළිබඳ තීරණ වෙනත් වගකිවයුතු මට්ටම්වලදී ගනු ලබන බවත්, මෙම යෝජනාව සහ එහි දෙමළ පරිවර්තනය නිර්මාණය වූ පසුබිම පිළිබඳව පක්ෂය විසින් පුළුල් විමර්ශනයක් පවත්වා සුදුසු පියවර ගන්නා බවත් ඔහු වැඩිදුරටත් සඳහන් කළේය. මෙම සිදුවීමට සම්බන්ධ යැයි කියන සභාපතිවරයා මීට පෙරද විනය පියවරයන්ට යටත්ව පක්ෂ සාමාජිකත්වයෙන් අත්හිටුවා සිටින අයෙකු බව සුමන්තිරන් මහතා මෙහිදී විශේෂයෙන් පෙන්වා දුන්නේය. පක්ෂයේ මූලධර්මවලින් බැහැරව මෙවැනි සංවේදී විදේශ ප්රතිපත්ති සම්බන්ධයෙන් තනි පුද්ගල තීරණ ගැනීම පක්ෂය දැඩිව හෙළා දකින බවද ඔහු සිය ප්රකාශය මගින් තහවුරු කර සිටියි.
