මෙම වසරේ පැවැත්වීමට නියමිත පාපන්දු ලෝක කුසලාන තරගාවලියට සහභාගී නොවන ලෙස අමෙරිකානු ජනාධිපති ඩොනල්ඩ් ට්රම්ප් ඉරාන ජාතික කණ්ඩායමට කළ අනතුරු ඇඟවීම හමුවේ ඉරාන පාපන්දු බලධාරීන් සහ ක්රීඩකයන් දැඩි විරෝධය පළ කර තිබේ. ට්රම්ප් පවසා සිටියේ ඉරාන ක්රීඩකයන්ගේ “ජීවිත ආරක්ෂාව වෙනුවෙන්” ඔවුන් තරගාවලියට සහභාගී නොවීම වඩාත් සුදුසු බවයි. කෙසේ වෙතත්, ඉරාන කණ්ඩායම අවධාරණය කරන්නේ ලෝක කුසලානය යනු ෆිෆා (FIFA) ආයතනය විසින් මෙහෙයවන ජාත්යන්තර උළෙලක් මිස තනි රටකට අවශ්ය පරිදි තීරණ ගත හැකි අවස්ථාවක් නොවන බවයි.
අමෙරිකාව සහ ඉස්රායලය එක්ව එල්ල කළ ප්රහාරයකින් ඉරාන උත්තරීතර නායක අයතුල්ලා අලි කමේනි ඝාතනය වීමෙන් පසු දෙරට අතර යුදමය වාතාවරණය අතිශය උත්සන්න වී තිබේ. මෙම තත්ත්වය හමුවේ ඉරාන ක්රීඩකයන්ට අමෙරිකාව තුළ ආරක්ෂාවක් නොමැති බව පවසමින් ඉරාන ක්රීඩා අමාත්යවරයා මීට පෙර සඳහන් කළේ තම කණ්ඩායම තරගාවලියට සහභාගී නොවන බවයි. එහෙත් නවතම නිවේදනයක් නිකුත් කරමින් ඉරාන කණ්ඩායම පවසන්නේ, තරගාවලියට සහභාගී වන කණ්ඩායම්වලට ආරක්ෂාව සැපයීමට සත්කාරක රටක් ලෙස අමෙරිකාව අපොහොසත් වන්නේ නම්, ලෝක කුසලානයෙන් ඉවත් කළ යුත්තේ ඉරානය නොව අමෙරිකාව බවයි.
අමෙරිකාව, කැනඩාව සහ මෙක්සිකෝව සත්කාරකත්වය දරන මෙම ලෝක කුසලාන තරගාවලියේ ඉරානය ‘G’ කාණ්ඩය යටතේ බෙල්ජියම, ඊජිප්තුව සහ නවසීලන්තය සමඟ තරග වැදීමට නියමිතව ඇත. ඉරානය තරගාවලියෙන් ඉවත් වුවහොත් ඒ වෙනුවට වෙනත් රටක් තෝරා ගැනීම සංවිධායකයන්ට විශාල ගැටලුවක් වනු ඇත. යුද ගිනි මැද ක්රීඩාව ද දේශපාලනික සහ ආරක්ෂක අර්බුදයකට මුහුණ දී ඇති මෙම තත්ත්වය ජාත්යන්තර පාපන්දු ලෝලීන්ගේ දැඩි අවධානයට ලක්ව තිබේ.
