මැදපෙරදිග කලාපයේ උද්ගතව ඇති යුදමය තත්ත්වය මධ්යයේ, ඇෆ්ගනිස්ථානය සහ පාකිස්ථානය අතර පවතින දේශසීමා ගැටුම් මේ වන විට තෙවන සතියටත් එළඹ තිබේ. පාකිස්ථාන ආරක්ෂක අංශ විසින් ඇෆ්ගනිස්ථානයේ කාබුල් නුවර සහ නැගෙනහිර ප්රදේශවල පිහිටි “ත්රස්තවාදී සැඟවුම් ස්ථාන” ඉලක්ක කර එල්ල කළ ගුවන් ප්රහාරවලින් කාන්තාවන් සහ දරුවන් ඇතුළු සිවිල් වැසියන් හය දෙනෙකු මියගොස් ඇති බව තලේබාන් රජය තහවුරු කරයි. මීට අමතරව කන්දහාර් ගුවන් තොටුපළ අසල පිහිටි ඉන්ධන ගබඩා කිහිපයකට ද මෙම ප්රහාරවලින් දැඩි හානි සිදුව ඇති බව වාර්තා වේ.
පෙබරවාරි 26 වැනිදා ආරම්භ වූ මෙම ගැටුම්කාරී වාතාවරණය හේතුවෙන් මේ වන විට 115,000කට අධික පිරිසක් අවතැන් වී ඇති බව එක්සත් ජාතීන්ගේ සංවිධානය පෙන්වා දෙයි. ඇෆ්ගනිස්ථානය තුළ පාකිස්ථාන තලේබාන් (TTP) සහ අයි.එස්.අයි.එස්. (ISIS) ක්රියාකාරීන් රැඳී සිටින බවට පාකිස්ථානය චෝදනා කළද, කාබුල් බලධාරීන් එම චෝදනා තරයේ ප්රතික්ෂේප කරයි. එක්සත් ජාතීන්ගේ වාර්තාවලට අනුව, පසුගිය සති දෙකක කාලය තුළ පමණක් පාකිස්ථාන හමුදා ක්රියාකාරකම් හේතුවෙන් ළමුන් 24 දෙනෙකු ඇතුළු සිවිල් වැසියන් 56 දෙනෙකු ජීවිතක්ෂයට පත්ව තිබේ.
තම හමුදා සාමාජිකයින් 12 දෙනෙකු ගැටුම්වලදී මියගොස් ඇති බව පාකිස්ථානය පිළිගන්නා අතර, තලේබාන් පාලනය කියා සිටින්නේ තමන් පාකිස්ථාන සොල්දාදුවන් 150කට අධික පිරිසක් මරා දමා ඇති බවයි. මෙම දේශසීමා අර්බුදය හේතුවෙන් දකුණු ආසියානු කලාපයේ ආරක්ෂාව පිළිබඳව ද මේ වන විට දැඩි අවදානමක් මතු වී තිබේ.
