රාමසාන් උපවාස මාසය නිමිත්තෙන් සංවිධානය කරන ලද විශේෂ ඉෆ්තාර් උත්සවයක් ජනාධිපති ලේකම් ආචාර්ය නන්දික සනත් කුමානායක මහතාගේ ප්රධානත්වයෙන් ජනාධිපති කාර්යාලයේදී පැවැත්විණි. ජනාධිපති කාර්යාලය සහ එහි සුබසාධක සංගමය එක්ව සංවිධානය කළ මෙම අවස්ථාවේදී එම්. එෆ්. ඒ. නුෆයිල් මව්ලවිතුමා විසින් රාමසාන් මාසයේ වැදගත්කම පිළිබඳ විශේෂ දේශනයක් පවත්වන ලදී. පස්වරු 6.23 ට උපවාසය අත්හැරීමෙන් අනතුරුව විශේෂ යාඥා මෙහෙයක් සහ භෝජන සංග්රහයක් ද පැවැත්වුණු අතර ජනාධිපති ලේකම්වරයා එහි පැමිණ සිටි බැතිමතුන් සමඟ සුහද කතාබහක නිරත විය.
බහුජාතික රටක් ලෙස එකිනෙකාගේ සංස්කෘතීන් අගය කරමින් කටයුතු කිරීමේ වැදගත්කම මෙහිදී අවධාරණය කළ ජනාධිපති ලේකම්වරයා, රාමසාන් උත්සවය ශ්රී ලාංකේය ජනතාවගේ ජාතික සංහිඳියාව විදහාපාන සුවිශේෂී අවස්ථාවක් බව සඳහන් කළේය. ජනාධිපති අරමුදලේ ලේකම් රෝෂන් ගමගේ මහතා ඇතුළු ජ්යෙෂ්ඨ අතිරේක ලේකම්වරුන්, අධ්යක්ෂ ජනරාල්වරුන් සහ ජනාධිපති කාර්යාලයේ ඉස්ලාම් භක්තික නිලධාරීන් පිරිසක් ද මෙම අවස්ථාවට සහභාගී වී සිටියහ. රජයේ ප්රධාන ආයතනයක් තුළ මෙවැනි ආගමික වැඩසටහන් සංවිධානය කිරීම හරහා ජාතීන් අතර සහජීවනය වර්ධනය වන බව හෙතෙම වැඩිදුරටත් පැවසීය.
