මැදපෙරදිග කලාපයේ පවතින උග්ර යුදමය තත්ත්වය හේතුවෙන් ගෑස් සැපයුම අඩාල වීම වැළැක්වීම සඳහා ශ්රී ලංකාව අමෙරිකා එක්සත් ජනපදයෙන් දේශීය පරිභෝජනයට අවශ්ය ගෑස් මිලදී ගැනීමට පියවර ගෙන තිබේ. ලිට්රෝ ගෑස් ලංකා සමාගමේ සභාපති චන්න ගුණවර්ධන මහතා සඳහන් කළේ, වත්මන් තත්ත්වය හමුවේ සැපයුම් දාමයට එල්ල විය හැකි බාධා මඟහරවා ගැනීම සඳහා මෙම තීරණය ගත් බවයි. ඒ අනුව අමෙරිකාවෙන් ආනයනය කරන ලද මෙට්රික් ටොන් 22,000ක ගෑස් නෞකාවක් මෙරට ප්රමාණවත් ගබඩා පහසුකම් නොමැතිකම හේතුවෙන් මේ වන විට මාලදිවයින අසල මුහුදේ රඳවා තබා ඇති අතර තවත් මෙට්රික් ටොන් 33,000ක නෞකාවක් ඉදිරියේදී පැමිණීමට නියමිතය.
අමෙරිකාවෙන් ගෑස් ආනයනය කිරීමේදී මිලෙහි විශාල වෙනසක් නොමැති වුවද, ප්රවාහන දුර ප්රමාණය වැඩි වීම නිසා නැව් ගාස්තු ඉහළ යන බව සභාපතිවරයා පෙන්වා දෙයි. එබැවින් පාරිභෝගිකයාට ලැබෙන මූල්යමය වාසියට වඩා සැපයුමේ ස්ථාවරත්වය සහතික කිරීම මෙහි ප්රධාන අරමුණ වී තිබේ. මේ අතර, ලාෆ්ස් ගෑස් (LAUGFS Gas) සැපයුම අඩාල වීම හේතුවෙන් වෙළෙඳපොළේ ඇති වී තිබෙන අමතර ඉල්ලුම සපුරාලීමට ලිට්රෝ සමාගම මේ වන විට කටයුතු කරමින් සිටියි. ප්රධාන නගරවල සැපයුම සාමාන්ය තත්ත්වයට පත් කර ඇති අතර ග්රාමීය ප්රදේශවල පවතින හිඟය මඟහැරවීමට ද කඩිනම් පියවර ගනිමින් සිටින බව ඔහු වැඩිදුරටත් සඳහන් කළේය.
