රුපියල් එක් කෝටි අසූ ලක්ෂයක් වටිනා විදේශීය නිෂ්පාදිත දුම්වැටි තොගයක් සහ භාවිතා කරන ලද ජංගම දුරකථන තොගයක් නීතිවිරෝධී ලෙස මෙරටට රැගෙන පැමිණි චීන ජාතිකයන් පස් දෙනෙකු අද (මාර්තු 17) අලුයම කටුනායක ගුවන් තොටුපොළේදී රේගු නිලධාරීන් විසින් අත්අඩංගුවට ගෙන තිබේ. ශ්රී ලංකාවේ සංචාරය කිරීම සඳහා පැමිණි බව කියන මොවුන් පස් දෙනා අලුයම 12.10 ට චීනයේ ෂැංහයි නුවර සිට චයිනා ඊස්ටන් ගුවන් සේවයට අයත් එම්.යූ.- 6017 දරණ ගුවන් යානයෙන් මෙරටට පැමිණ ඇත.
ගුවන් තොටුපොළ රේගු නිලධාරීන් විසින් සිදුකළ පරීක්ෂාවකදී මොවුන්ගේ ගමන් මලු තුළ සඟවා තිබූ චීනයේ නිෂ්පාදිත දුම්වැටි 99,400 ක් අඩංගු දුම්වැටි කාටූන් 497 ක් සොයාගෙන තිබේ. ඊට අමතරව චීනයේ භාවිතා කරන ලද ජංගම දුරකථන 422 ක් ද මොවුන් විසින් නීතිවිරෝධී ලෙස මෙරටට ගෙන ඒමට උත්සාහ කර තිබියදී අත්අඩංගුවට ගෙන ඇත.
අත්අඩංගුවට ගත් භාණ්ඩ තොගය රජයට රාජසන්තක කිරීමට පියවර ගෙන ඇති අතර, සිද්ධිය සම්බන්ධයෙන් ගුවන් තොටුපොළ රේගුව වැඩිදුර විමර්ශන පවත්වයි. විදේශීය ජාතිකයින් සංචාරක වීසා මත මෙරටට පැමිණ මෙවැනි ජාවාරම්වල නිරත වීම වැළැක්වීම සඳහා ගුවන් තොටුපොළ ආරක්ෂාව සහ රේගු පරීක්ෂා කිරීම් තවදුරටත් දැඩි කර ඇති බව බලධාරීහු පවසති.
