චීනයේ Pop Mart සමාගම සහ Sony Pictures Entertainment එක්ව ලොව පුරා අතිශය ජනප්රිය වූ Labubu රූකඩ චරිතය ඇසුරින් නවතම සිනමා පටයක් නිර්මාණය කිරීමට සැලසුම් කර තිබේ. “Paddington 2” සහ “Wonka” වැනි ලොව සුපතළ චිත්රපට අධ්යක්ෂණය කළ පෝල් කින්ග් (Paul King) මෙම චිත්රපටය අධ්යක්ෂණය කිරීමට සහ නිෂ්පාදනය කිරීමට එක්ව සිටීම විශේෂත්වයකි.
කැසින් ලුන්ග් (Kasing Lung) නම් කලාකරුවා විසින් 2015 වසරේදී නිර්මාණය කරන ලද Labubu චරිතය, මේ වන විට ජාත්යන්තර මට්ටමේ සංස්කෘතික සලකුණක් බවට පත්ව ඇත. Pop Mart සමාගම ඩිස්නි (Disney) සමාගමේ ආදර්ශය අනුගමනය කරමින් සිය සෙල්ලම් බඩු සන්නාමය සිනමාව, තේමා උද්යාන සහ විනෝදාස්වාද ක්ෂේත්රය දක්වා ව්යාප්ත කිරීමට මෙලෙස පියවර ගෙන තිබේ. සජීවී රංගනයන් සහ පරිගණක සජීවීකරණය (CGI) මුසු වූ නිර්මාණයක් ලෙස මෙය එළිදැක්වීමට නියමිතය.
Labubu ගේ ජනප්රියත්වය හේතුවෙන් පසුගිය වසර තුළ Pop Mart සමාගමේ කොටස් අගය 64% කින් ඉහළ ගොස් ඇති අතර, එහි වෙළඳපල වටිනාකම Hasbro සහ Mattel වැනි ප්රබල සමාගම් අභිබවා ගොස් ඇත. ‘Dear Evan Hansen’ හි රචක ස්ටීවන් ලෙවන්සන් (Steven Levenson) මෙහි තිර පිටපත ලිවීමට එක්ව සිටින අතර, මෙය Labubu සන්නාමය ජාත්යන්තර වශයෙන් තවදුරටත් ප්රචලිත කිරීමට ඉවහල් වනු ඇතැයි ආර්ථික විශ්ලේෂකයෝ පවසති.
