දෙහිවල සහ ගල්කිස්ස ප්රදේශ කේන්ද්ර කරගනිමින් ක්රියාත්මක වන ප්රබල පාතාල කල්ලි දෙකක් අතර හටගෙන ඇති දේපළ ආරවුලක් හේතුවෙන් ප්රදේශයේ දැඩි නොසන්සුන්කාරී වාතාවරණයක් නිර්මාණය වී තිබේ. පසුගියදා (18) බදාදා ගල්කිස්ස ගුණවර්ධන පාරේදී විශේෂ කාර්ය බලකාය (STF) විසින් අත්අඩංගුවට ගත් 18 හැවිරිදි තරුණයෙකු සන්තකයේ තිබී අතිනවීන ගිනි අවි සහ ජීව උණ්ඩ තොගයක් සොයා ගැනීමත් සමඟ මෙම බරපතල ඝාතන සැලසුම අනාවරණය විය. අත්අඩංගුවට ගත් සැකකරු විදේශගතව සිටින ‘බඩෝවිට අසංක’ නමැති අපරාධකරුගේ ප්රධාන ගෝලයෙකු වන ‘සැන්ඩෝ’ නමැත්තාගේ අනුගාමිකයෙකු බව තහවුරු වී ඇත.
මෙම අවි ආයුධ රැස් කිරීමේ ප්රධාන අරමුණ වී ඇත්තේ දෙහිවල ප්රදේශයේ ප්රසිද්ධ ව්යාපාරිකයෙකු වන ‘ලැරී’ නමැත්තා ඝාතනය කිරීම බව පොලිස් විමර්ශනවලදී හෙළි වී තිබේ. දෙහිවල ඓතිහාසික මුහන්දිරම් වලව්ව ඇතුළු ව්යාපාරික ස්ථාන කිහිපයක හිමිකාරිත්වය දරන ලැරීට, විදේශගතව සිටින පාතාල අපරාධකරුවෙකු වන ‘ඇල්ටෝ ධර්මේ’ සහ ‘සැන්ඩෝ’ විසින් මීට පෙර අවස්ථා කිහිපයකදීම මරණ තර්ජන එල්ල කර ඇත. මුහන්දිරම් වලව්වේ හිමිකාරිත්වය පාතාලය වෙත පවරා දී ඉන් ඉවත් නොවුණහොත් ඔහුව සහ ඔහුගේ පවුලේ සාමාජිකයන් ඝාතනය කරන බවට එම අපරාධකරුවන් විසින් දුරකථනයෙන් තර්ජනය කර ඇති බව වාර්තා වේ.
කෙසේ වෙතත්, මෙම තර්ජනයට ලක්ව සිටින ව්යාපාරික ලැරී සම්බන්ධයෙන් ද බරපතල චෝදනා රැසක් එල්ල වී තිබේ. මුහන්දිරම් වලව්වේ සැබෑ අයිතිකරුගේ මානසික රෝගී තත්ත්වය ප්රයෝජනයට ගෙන ව්යාජ ඔප්පු මගින් එම දේපළ කොල්ලකෑම, සුනාමි ආරක්ෂිත කලාපයේ රජයේ ඉඩම් බලහත්කාරයෙන් අත්පත් කර ගැනීම සහ විදේශගත දෙමළ ජාතිකයන්ගේ මහල් නිවාස බලහත්කාරයෙන් සන්තක කර ගැනීම වැනි චෝදනා ඒ අතර වේ. එමෙන්ම කප්පම් ලබා ගැනීමේ අරමුණින් ජාතිවාදී ගැටුම් ඇති කිරීමට උත්සාහ කළ බවට ද ඔහුට එරෙහිව තොරතුරු අනාවරණය වී ඇත.
මෙම සියලු අපරාධ සහ තර්ජනය කිරීම් සිදුවන්නේ මහජන ආරක්ෂක අමාත්යාංශයේ ලේකම් රවී සෙනවිරත්න මහතාගේ නිවසට නුදුරු ප්රදේශයක වීම විශේෂත්වයකි. පාතාල කල්ලි අතර පවතින මෙම දේපළ ආරවුල සහ ඝාතන සැලසුම් හමුවේ පොලිසියේ ක්රියාකලාපය පිළිබඳව ද දැඩි විවේචන එල්ල වෙමින් පවතී. නීතිය අතට ගෙන ක්රියා කරන අපරාධකරුවන් සහ දේපළ ජාවාරම්කරුවන් හේතුවෙන් දෙහිවල සහ ගල්කිස්ස වෙරළබඩ කලාපයේ ව්යාපාරිකයන් දැඩි භීතියට පත්ව සිටින අතර, මෙම තත්ත්වය මර්ධනය කිරීමට කඩිනම් පියවර ගන්නා ලෙස මහජනතාව බලධාරීන්ගෙන් ඉල්ලා සිටිති.
