ආසියානු සංවර්ධන බැංකුවේ (ADB) සභාපති මසාටෝ කන්ඩා මහතා තෙදින නිල සංචාරයක් සඳහා අද (23) ශ්රී ලංකාවට පැමිණීමට නියමිතව තිබේ. කටුනායක බණ්ඩාරනායක ජාත්යන්තර ගුවන් තොටුපළෙන් දිවයිනට ළඟා වන ඒ මහතාව පිළිගැනීම සඳහා කම්කරු අමාත්යවරයා සහ මුදල් හා සැලසුම් නියෝජ්ය අමාත්ය ආචාර්ය අනිල් ජයන්ත ප්රනාන්දු මහතා එක්වනු ඇත. මෙම සංචාරය අතරතුර සභාපතිවරයා කොළඹ වරාය පාලක මැදිරිය නිරීක්ෂණය කිරීමටත්, පෞද්ගලික අංශයේ නියෝජිතයන් සමඟ විශේෂ සාකච්ඡාවකට සහභාගී වීමටත් නියමිතය.
සංචාරයේ දෙවැනි දිනය වන හෙට (24) මසාටෝ කන්ඩා මහතා විශේෂ නිරීක්ෂණ චාරිකාවක නිරත වීමට සැලසුම් කර තිබේ. ඒ මෑතකදී බලපෑ ‘දිට්වා’ සුළි කුණාටුවෙන් දැඩි හානි සිදු වූ කෑගල්ල දිස්ත්රික්කයේ අරණායක, නාරංගල සහ අඹලන්කන්ද යන ප්රදේශවලටය. හෙලිකොප්ටර් යානා මඟින් එම ප්රදේශවලට ගොස් සිදු වූ විනාශය පිළිබඳව ඒ මහතා පෞද්ගලිකවම සොයා බැලීමට නියමිත අතර හෙට පස්වරුවේ ජනාධිපති ලේකම් කාර්යාලයේදී ජනාධිපතිවරයා හමුවී විශේෂ සාකච්ඡා පවත්වනු ඇත. සියලු නිල කටයුතු නිම කිරීමෙන් පසු සභාපතිවරයා අනිද්දා (25) අලුයම දිවයිනෙන් පිටත්ව යෑමට නියමිතය.
මේ අතර දිවයිනේ පවතින කාලගුණික තත්ත්වය පිළිබඳව ද අවධානය යොමු වී තිබේ. කාලගුණ විද්යා දෙපාර්තමේන්තුව පවසන්නේ අද පස්වරු 2.00 න් පමණ පසුව බස්නාහිර, සබරගමුව පළාත්වලත් ගාල්ල, මාතර සහ නුවරඑළිය දිස්ත්රික්කවලත් තැනින් තැන වැසි හෝ ගිගුරුම් සහිත වැසි ඇති විය හැකි බවයි. එමෙන්ම ඉන්දීය අග්රාමාත්ය නරේන්ද්ර මෝදි මහතා දින 8,931 ක් රජයක නායකත්වය දරමින් ඉන්දීය දේශපාලන ඉතිහාසයේ නව වාර්තාවක් පිහිටුවා ඇති අතර ශ්රී ලංකාවේ විශ්රාමික රියඅද්මිරාල් ප්රින්ස්ලි ලියනගේ මහතා පැය 48 ක් අඛණ්ඩව ධාවනය කරමින් නව ගිනස් වාර්තා තුනක් පිහිටුවමින් මව්බිමට ගෞරවයක් ගෙන ඒමට සමත් වී තිබේ.
