ඉන්දියාවේ ඡාර්කන්ඩ් (Jharkhand) ප්රාන්තයේ චත්රා දිස්ත්රික්කයට අයත් සිමාරියා ප්රදේශයේ ඝන වනාන්තරයකට ගුවන් ගිලන් රථයක් (Air Ambulance) කඩා වැටීමෙන් එහි ගමන් කළ පුද්ගලයින් හත් දෙනෙකුම ජීවිතක්ෂයට පත්ව තිබේ. රංචි (Ranchi) සිට දිල්ලි බලා පියාසර කරමින් තිබූ මෙම යානය ඊයේ (23) රාත්රියේ දරුණු කුණාටු සහිත කාලගුණයකට හසුවී මෙලෙස අනතුරට ලක්ව ඇති බව වාර්තා වේ.රෙඩ්බර්ඩ් එයාර්වේස් (Redbird Airways) සමාගමට අයත් මෙම බීච්ක්රාෆ්ට් C90 (Beechcraft C90) වර්ගයේ යානය පස්වරු 7:11 ට රංචි ගුවන් තොටුපළෙන් ගුවන් ගත වී විනාඩි 20කට පමණ පසු පාලක මැදිරිය සමඟ සබඳතා බිඳී ගොස් ඇත. යානය කඩා වැටීමට මොහොතකට පෙර අයහපත් කාලගුණය මග හැරීම සඳහා ගමන් මාර්ගය වෙනස් කිරීමට ගුවන් නියමුවන් අවසර ඉල්ලා ඇති බව ඉන්දීය සිවිල් ගුවන් සේවා අධ්යක්ෂ ජනරාල් කාර්යාලය (DGCA) තහවුරු කළේය.මෙම අනතුරින් මියගිය පිරිස අතර රියදුරන් දෙදෙනෙකු, වෛද්යවරයෙකු, සහායකයෙකු සහ 65% ක පිළිස්සුම් තුවාල ලබා වැඩිදුර ප්රතිකාර සඳහා දිල්ලි වෙත රැගෙන යමින් සිටි 41 හැවිරිදි සංජේ කුමාර් නැමැති රෝගියා සහ ඔහුගේ ඥාතීන් දෙදෙනෙකු ද වෙති. ඝන වනාන්තරයක් සහිත ප්රදේශයක් වීම හේතුවෙන් සහන සේවා කණ්ඩායම්වලට එම ස්ථානයට ළඟා වීමට දැඩි වෙහෙසක් දැරීමට සිදුවූ අතර, මේ වන විට මළ සිරුරු සියල්ලම සොයාගෙන තිබේ.අනතුර සිදුවූ අවස්ථාවේ ප්රදේශයේ තද වැසි, සුළං සහ අකුණු සහිත දරුණු කාලගුණයක් පැවති බව ප්රදේශවාසීන් පවසන අතර, යානය විශාල ශබ්දයක් සමඟ කඩා වැටෙනු තමන් දුටු බව ද ඔවුහු කියා සිටිති. මේ සම්බන්ධයෙන් විධිමත් පරීක්ෂණයක් පැවැත්වීම සඳහා ගුවන් අනතුරු විමර්ශන කාර්යාංශයේ (AAIB) කණ්ඩායමක් එම ස්ථානයට පිටත් කර හැර ඇති අතර, යානයේ ‘කළු පෙට්ටිය’ (Black Box) සොයා ගැනීමට මෙහෙයුම් ක්රියාත්මක වේ.
