මැදපෙරදිග කලාපයේ පවතින යුදමය වාතාවරණය හේතුවෙන් ගුවන් යානා ඉන්ධන මිල ශීඝ්රයෙන් ඉහළ යාම මත සියලුම ගුවන් ගාස්තු ඉහළ දැමීමට එයාර් නිව්සීලන්ඩ් (Air New Zealand) සමාගම පියවර ගෙන ඇති බව රොයිටර් පුවත් සේවය වාර්තා කරයි. යුද්ධයට පෙර බැරලයක් ඩොලර් 85-90 අතර පැවති ගුවන් යානා ඉන්ධන මිල මේ වන විට ඩොලර් 150-200 දක්වා ඉහළ ගොස් ඇති අතර, මෙම පිරිවැය මගීන් වෙත පැවරීමට ගෝලීය ගුවන් සමාගම් තීරණය කර තිබේ. එසේම පවතින අවිනිශ්චිත තත්ත්වය හමුවේ එයාර් නිව්සීලන්ඩ් සමාගම සිය 2026 මූල්ය පුරෝකථනයන් ද තාවකාලිකව අත්හිටුවා ඇත.
එයාර් නිව්සීලන්ඩ් සමාගම නිවේදනය කළේ දේශීය ගුවන් ගාස්තු නවසීලන්ත ඩොලර් 10කින් ද, කෙටි දුර ජාත්යන්තර ගාස්තු ඩොලර් 20කින් සහ දිගු දුර ගුවන් ගාස්තු ඩොලර් 90කින් ද ඉහළ නංවා ඇති බවයි. මේ අතර වියට්නාම් එයාර්ලයින්ස් (Vietnam Airlines) සමාගම ද ඉන්ධන මිල ඉහළ යාම නිසා සිය මෙහෙයුම් පිරිවැය 60%-70%කින් ඉහළ ගොස් ඇති බව පවසමින්, ජෙට් ඉන්ධන මත පනවා ඇති පාරිසරික බද්ද ඉවත් කරන ලෙස රජයෙන් ඉල්ලා තිබේ. පවතින ගුවන් සීමා වැසීයාම් සහ ඉන්ධන අර්බුදය හමුවේ ලෝකයේ ප්රධාන ගුවන් ගමන් මාර්ගවල ටිකට් පත් මිල ගණන් අහස උසට ඉහළ යමින් පවතී.
කෙසේ වෙතත්, ඊයේ දිනයේ ගුවන් සේවා කොටස්වල දක්නට ලැබුණු දැඩි පසුබෑම අද දිනයේ යම් ස්ථාවර මට්ටමකට පැමිණ තිබේ. ඇමරිකානු ජනාධිපති ඩොනල්ඩ් ට්රම්ප් විසින් යුද්ධය ඉක්මනින් අවසන් විය හැකි බවට කළ ප්රකාශයත් සමඟ තෙල් මිල බැරලයක් ඩොලර් 90 දක්වා පහළ වැටීම මීට ප්රධානතම හේතුවයි. ඒ අනුව කොරියන් එයාර් ලයින්ස් 8%කින් ද, කැතේ පැසිෆික් 4%කින් ද, එයාර් නිව්සීලන්ඩ් 2%කින් සහ ක්වන්ටාස් ගුවන් සේවය 1.5%කින් ද කොටස් වෙළඳපොළ තුළ සිය අගය ඉහළ නංවා ගැනීමට සමත් විය.
මෙම යුද වාතාවරණය ගෝලීය සංචාරක කර්මාන්තයට ද දැඩි බලපෑමක් එල්ල කර ඇති අතර, තායිලන්තය වැනි රටවල් ඉදිරි සති කිහිපය තුළ විශාල සංචාරකයන් පිරිසක් සහ බිලියන ගණනක ආදායමක් අහිමි වනු ඇතැයි පුරෝකථනය කරයි. දකුණු කොරියාවේ HanaTour ආයතනය දැනටමත් මාර්තු මාසය සඳහා වන මැදපෙරදිග සංචාර සියල්ල අවලංගු කර ඇති අතර, එම පාරිභෝගිකයන්ගෙන් අවලංගු කිරීමේ ගාස්තු අය නොකිරීමට ද තීරණය කර තිබේ.
