ඇමෙරිකාවේ ඇලබාමා ප්රාන්තයේ මොන්ට්ගොමරි නුවර කේන්ද්ර කරගනිමින් වසර පහක් පුරා ක්රියාත්මක වූ දරුණු ලිංගික ජාවාරම් ජාලයකට සම්බන්ධ ප්රධාන සැකකරුවන් ඇතුළු පස් දෙනෙකුට එරෙහිව එරට අධිකරණය විසින් ඊයේ දැඩි දඬුවම් නියම කරන ලදී. මෙම අපරාධ ජාලය මෙහෙයවූ ප්රධාන සැකකරු වන 32 හැවිරිදි කිමානි ජෝන්ස් හට වසර 54ක සිරදඬුවමක් නියම වූ අතර ඔහුගේ පියා වන 50 හැවිරිදි ට්රෙමේන් ලැම්බර්ට් හට වසර 30ක සිරදඬුවමක් නියම විය. 2025 ඔක්තෝබර් මාසයේ පැවති නඩු විභාගයකදී මොවුන් දෙදෙනා මිනිස් ජාවාරම් සම්බන්ධ චෝදනා රැසකට වරදකරුවන් වූ අතර සිරදඬුවමට අමතරව වින්දිතයන් සඳහා ඇමෙරිකානු ඩොලර් මිලියන 1.5කට අධික වන්දියක් ගෙවන ලෙස ද අධිකරණය නියෝග කළේය.
මෙම නඩුවට අදාළව මීට පෙර වරද පිළිගත් තවත් සැකකරුවන් තිදෙනෙකුට ද ඊයේ දඬුවම් නියම වූ අතර ඒ අනුව ජෝසප් කියොන් බෝව් හට වසර 19.5ක සිරදඬුවමක් ද ඩැරිල් ගාර්ඩ්නර් හට වසර 16ක සිරදඬුවමක් ද නියම විය. අනෙක් සැකකාරිය වන ඇලීසියා ස්කොට් හට වසර තුනක පරිවාස කාලයක් සහ වන්දි මුදලක් ගෙවීමට නියම කෙරිණි. අධිකරණයේදී අනාවරණය වූ සාක්ෂිවලට අනුව මෙම කල්ලිය විසින් වසර ගණනාවක් පුරා කාන්තාවන් සහ කුඩා දැරියන් රඳවා තබාගෙන ඔවුන්ට ආහාර, ඇඳුම් සහ මත්ද්රව්ය ලබාදෙන බව පවසමින් දරුණු වධහිංසා පමුණුවමින් ලිංගික ශ්රමය සූරාකෑමේ නිරත වී ඇත.
මෙම තීන්දුව ප්රකාශයට පත් කරමින් එරට අධිකරණ දෙපාර්තමේන්තුවේ අපරාධ අංශයේ සහකාර නීතිපති ඒ. ටයිසන් ඩුවා සඳහන් කළේ වසර ගණනාවක් පුරා අහිංසක කාන්තාවන් සහ දැරියන් අමානුෂික ලෙස අපයෝජනයට ලක්කළ මෙම වැරදිකරුවන්ට ලබාදුන් දීර්ඝ සිරදඬුවම් මගින් ඔවුන් කළ දරුණු අපරාධවල ස්වභාවය මැනවින් පිළිබිඹු වන බවයි. මෙම අපරාධ ජාලය “ස්ටැටික්” සහ “බේරොක්” යන අන්වර්ථ නාමවලින් පවා හඳුන්වා ඇති අතර ඔවුන්ගේ ක්රියාවන් අතිශය පිළිකුල් සහගත බව අධිකරණය වැඩිදුරටත් අවධාරණය කළේය.
