මෙරට තෘතීයික සත්කාර සේවා සපයනු ලබන සියලුම රෝහල් සෞඛ්ය අමාත්යාංශය යටතට පවරාගෙන පවත්වාගෙන යාම පිළිබඳව රජයේ අවධානය යොමු වී ඇති බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ප්රකාශ කළේය. අමාත්යවරයා මේ බව සඳහන් කළේ මීගමුව දිස්ත්රික් මහ රෝහලේ නවීකරණය කරන ලද ශල්යාගාර සංකීර්ණය ජනතා අයිතියට පත් කිරීමේ උත්සවයට සහභාගී වෙමිනි. වසර 2015 සිට විවිධ තාක්ෂණික දෝෂ හේතුවෙන් භාවිතයෙන් ඉවත් කර තිබූ මෙම ශල්යාගාර පද්ධතිය යළි විවෘත කිරීම මීගමුව ප්රදේශයේ ජනතාවට මහත් සහනයක් වනු ඇත.
වත්මන් සෞඛ්ය ප්රතිපත්තියට අනුව ප්රාථමික සහ ද්විතීයික සත්කාර සේවා පළාත් සභා යටතේ පවත්වාගෙන ගියද, වඩාත් උසස් වෛද්ය පහසුකම් සහිත තෘතීයික සත්කාරක රෝහල් මධ්යම රජය යටතේ පැවතීම කාර්යක්ෂම සේවාවක් සැපයීමට අත්යවශ්ය බව අමාත්යවරයා මෙහිදී අවධාරණය කළේය. දැනට දිස්ත්රික් මහ රෝහල් හතක් සෞඛ්ය අමාත්යාංශය යටතේ පාලනය නොවන බවත්, ඉන් හතරක් උතුරු පළාතේත් තුනක් බස්නාහිර පළාතේත් පිහිටා ඇති බවත් ඔහු පෙන්වා දුන්නේය.
මෙම පවරා ගැනීමේ ක්රියාවලියේ පළමු පියවරක් ලෙස හොරණ දිස්ත්රික් මහ රෝහල ඉතා ඉක්මනින් මධ්යම රජයට පවරා ගැනීමට කටයුතු කරන බව අමාත්යවරයා අනාවරණය කළේය. එමෙන්ම ගම්පහ දිස්ත්රික් මහ රෝහල වැනි ප්රධාන රෝහල් සෞඛ්ය අමාත්යාංශය යටතේ පැවතීම දිස්ත්රික්කයේ සෞඛ්ය සේවාව විධිමත් කිරීමට බෙහෙවින් උපකාරී වන බවද ඔහු වැඩිදුරටත් සඳහන් කළේය.
