වසර 223ක අමරපුර මහා නිකායික ඉතිහාසයේ සන්ධිස්ථානයක් සනිටුහන් කරමින්, විදේශයක පිහිටුවන ලද ප්රථම අමරපුර සංඝ සභාව අද (02) ජපානයේදී නිල වශයෙන් ආරම්භ කරන ලදී. ජපානයේ ‘ෆුජි සුගත’ (Fuji Sugatha) ආරාමයේදී පැවැත්වුණු මෙම පුණ්ය මහෝත්සවය ශ්රී ලංකා අමරපුර මහා සංඝ සභාවේ මහා ලේඛකාධිකාරි පූජ්ය බලපිටියේ සිරිසීවලි නාහිමියන්ගේ ප්රධානත්වයෙන් සිදු විය.
ශ්රී ලංකාව පුරා දිස්ත්රික් සංඝ සභා 22ක් පිහිටුවා ඇති අතර, ජපානය කේන්ද්ර කරගනිමින් මෙම සංඝ සභාව පිහිටුවීම හරහා අමරපුර භික්ෂු වංශයේ චිර පැවැත්ම සහ සම්බුද්ධ ශාසනයේ අභිවෘද්ධිය අපේක්ෂා කරන බව සිරිසීවලි නාහිමියෝ මෙහිදී අවධාරණය කළහ. අග්ගමහා පණ්ඩිත අතිපූජ්ය කරගොඩ උයන්ගොඩ මෛත්රීමූර්ති මහනායක ස්වාමීන්ද්රයන් වහන්සේ ද අන්තර්ජාලය ඔස්සේ සම්බන්ධ වෙමින් මෙම අවස්ථාවට සිය ආශිර්වාදය පළ කළහ.
මෙම නව සංඝ සභාවේ නිලධාරී මණ්ඩලය ලෙස සභාපති පූජ්ය හුරුලුනිකවැවේ සුධම්ම නාහිමි (ජපානයේ ප්රධාන සංඝනායක), ප්රධාන ලේකම් පූජ්ය වැහිගල සාරද හිමි, උපසභාපති පූජ්ය වෙම්බුවැවේ සුමනසාර හිමි, නියෝජ්ය ලේකම් පූජ්ය මුතුකණ්ඩියේ පියදස්සි හිමි සහ ප්රධාන සංවිධායක පූජ්ය ගිඩ්ඩව රාහුල හිමි යන ස්වාමීන් වහන්සේලා තේරී පත් විය.
ජපානයේ දින දර්ශනයට අනුව ගිම්හාන සෘතුවේ දෙවන පෝය දිනය අදට යෙදී තිබූ බැවින්, සංඝ සභාව පිහිටුවීමට ප්රථමයෙන් සාම්ප්රදායික පොහොය විනය කර්මය ද සිදු කරන ලදී. මෙමගින් ජපානය තුළ වෙසෙන අමරපුර නිකායික භික්ෂූන් වහන්සේලා අතර සහයෝගීතාවය තවදුරටත් වර්ධනය වනු ඇතැයි විශ්වාස කෙරේ.
