ඓතිහාසික අනුරාධපුර ජය ශ්රී මහා බෝ සමිඳුන් අභියසදී 59 වන වරටත් පැවැත්වෙන ජාතික අලුත් සහල් මංගල්යය අද (08) සහ හෙට (09) යන දෙදින තුළ උත්කර්ෂවත් අයුරින් පැවැත්වේ. ජනාධිපති අනුර කුමාර දිසානායක මහතාගේ ප්රධානත්වයෙන් පැවැත්වෙන මෙම පුණ්ය මහෝත්සවය, අටමස්ථානාධිපති අතිපූජ්ය ආචාර්ය පල්ලේගම හේමරතන නාහිමියන්ගේ අනුශාසනා පරිදි සංවිධානය කර ඇත.
දිවයිනේ දිස්ත්රික්ක 25 ම නියෝජනය වන පරිදි ගොවි ජනතාව සිය අස්වැන්නෙන් කොටසක් රැගෙන මෙම මංගල්යයට සහභාගී වන අතර, ගොවිජන සංවර්ධන දෙපාර්තමේන්තුව සහ කෘෂිකර්ම අමාත්යාංශය ඇතුළු ආයතන රැසක් මෙහි සංවිධාන කටයුතු සිදු කරයි. කෘෂිකර්ම අමාත්ය කේ.ඩී. ලාල් කාන්ත සහ නියෝජ්ය අමාත්ය නාමල් කරුණාරත්න යන මහත්වරුන් ඇතුළු රාජ්ය නිලධාරීන් මෙන්ම විශාල ගොවි ජනතාවක් ද මෙම අවස්ථාවට එක්වීමට නියමිතය. දේශයට සෙත් පතා සහ ඉදිරි වගා කටයුතු සාර්ථක කරගැනීමේ අරමුණින් වාර්ෂිකව පවත්වනු ලබන මෙම උත්සවය මෙරට කෘෂිකාර්මික සංස්කෘතියේ වැදගත් සන්ධිස්ථානයක් ලෙස සැලකේ.
