මාර්තු 10 දින පැවැති අමාත්ය මණ්ඩල රැස්වීමේදී ආපදා කළමනාකරණය සහ අවදානම් සහිත පවුල් නැවත පදිංචි කිරීම සම්බන්ධයෙන් තීරණාත්මක යෝජනා කිහිපයකට අනුමැතිය හිමි විය. 2025 නොවැම්බර් මාසයේ බලපෑ ‘දිට්වා’ සුළි කුණාටුවෙන් සිදු වූ ඇමෙරිකානු ඩොලර් බිලියන 4.1ක දැවැන්ත ආර්ථික හානිය සහ මිලියන 2.3ක ජනතාවකට එල්ල වූ බලපෑම සැලකිල්ලට ගනිමින් මෙම පියවර ගෙන තිබේ.
විද්යා හා තාක්ෂණ අමාත්යාංශය විසින් ආපදා කළමනාකරණය කිරීමේ කාර්යය, හුදෙක් ආපදා ඇති වූ පසු ප්රතිචාර දැක්වීමේ පැරණි ආකෘතියේ සිට ‘විද්යාව මත පදනම් වූ ආපදා හඳුනා ගැනීමට පෙර ඒ සඳහා ඔරොත්තු දීමේ’ නව උපායමාර්ගික රාමුවක් බවට පරිවර්තනය කිරීමට කටයුතු කර ඇත. ‘දිට්වා’ සුළි කුණාටුව දේශගුණික ආතති පරීක්ෂණයක් (Climate Stress Test) ලෙස හඳුනා ගනිමින් ඉදිරිපත් කළ නිර්දේශ 07ක් ක්රියාත්මක කිරීම සඳහා විද්යා හා තාක්ෂණ අමාත්යවරයා ඉදිරිපත් කළ ද්විත්ව මාර්ග ක්රමෝපාය මෙහිදී අමාත්ය මණ්ඩලය විසින් අනුමත කරන ලදී.
එමෙන්ම නායයෑම් සහ නායයෑමේ අධි අවදානම හේතුවෙන් සිය පදිංචි ස්ථානවලින් ඉවත් කර වෙනත් ස්ථානවල පදිංචි කළ යුතු පවුල් සඳහා ලබා දෙන නිවාස ආධාර මුදල ද සැලකිය යුතු ලෙස ඉහළ නැංවීමට රජය තීරණය කර තිබේ. ඒ අනුව මීට පෙර එක් නිවසක් ඉදිකිරීම සඳහා උපරිම වශයෙන් ලබා දුන් රුපියල් මිලියන 1.6ක මුදල රුපියල් මිලියන 2.5 දක්වා ඉහළ නැංවීමට ආරක්ෂක අමාත්යවරයා ලෙස ජනාධිපතිවරයා ඉදිරිපත් කළ යෝජනාවට අනුමැතිය හිමි විය. ප්රතිලාභියා විසින්ම නිවස ඉදිකර ගැනීමේ ක්රමවේදය යටතේ මෙම නව සහනය හිමි වන අතර එමඟින් අවදානම් කලාපවල ජීවත් වන ජනතාවට වඩාත් සුරක්ෂිත නිවසක් ගොඩනඟා ගැනීමට අවස්ථාව සැලසේ.
