ශ්රී ලංකාවේ පුද්ගලික රෝහල් සහ සාත්තු නිවාස සංගමය (APHNH) විසින් ප්රථම වරට සංවිධානය කරන ලද සෞඛ්ය නායකත්ව සමුළුව (Healthcare Leadership Summit 2026) පසුගිය මාර්තු 09 වන දින බත්තරමුල්ල වෝටර්ස් එජ් (Waters Edge) හෝටලයේදී සාර්ථකව පවත්වන ලදී. රෝහල් ප්රධානීන්, ප්රතිපත්ති සම්පාදකයන්, රක්ෂණ සමාගම් නියෝජිතයන් සහ ජාත්යන්තර විශේෂඥයන් රැසක් මෙයට සහභාගී වූ අතර, මෙරට සෞඛ්ය ක්ෂේත්රය තුළ ප්රායෝගිකව ක්රියාත්මක කළ හැකි ප්රමුඛතා පිළිබඳව මෙහිදී දීර්ඝ ලෙස සාකච්ඡා කෙරිණි. 1972 වසරේදී පිහිටුවන ලද APHNH සංගමය මෙරට පුද්ගලික සෞඛ්ය සේවාවේ ගුණාත්මකභාවය ඉහළ නැංවීමට සහ රජයේ රෝහල් පද්ධතියට සහාය වෙමින් රෝගී සත්කාරක සේවා පුළුල් කිරීමට නිරන්තරයෙන් දායකත්වය ලබා දෙයි.
මෙම සමුළුවේ මූලික අරමුණ වූයේ සාකච්ඡාවලට පමණක් සීමා නොවී, පුද්ගලික සෞඛ්ය ක්ෂේත්රයේ විනිවිදභාවය සහ මහජන විශ්වාසය තහවුරු කෙරෙන පැහැදිලි ක්රියාකාරී සැලැස්මක් සකස් කිරීම බව APHNH සභාපති රවීන් වික්රමසිංහ මහතා ප්රකාශ කළේය. මෙහිදී පැවති විශේෂ සාකච්ඡා සැසිවලදී ගෝලීය රෝහල් ඉදිකිරීම් විශේෂඥ වෛද්ය හෆීස් රහ්මාන් පදියත්, සෞඛ්ය පරිපාලන සහ කොවිඩ් මර්දන නායකත්ව විශේෂඥ වෛද්ය හම්දානි අන්වර් මෙන්ම රක්ෂණ ක්ෂේත්රය නියෝජනය කරමින් චන්දන එල්. අලුත්ගම යන මහත්වරුන් සිය අදහස් ඉදිරිපත් කළහ. රෝහල්වල මෙහෙයුම් විනය පවත්වා ගනිමින් රෝගී ආරක්ෂාව තහවුරු කරන ආකාරය සහ රක්ෂණ ක්ෂේත්රයේ නව අපේක්ෂාවන් පිළිබඳව එහිදී අවධානය යොමු විය.
සමුළුවේ දෙවන සැසියේදී තායිලන්තයේ පුද්ගලික රෝහල් සංගමයේ සභාපති වෛද්ය පයිබූන් එක්සැන්ග්ස්රි (Dr. Paiboon Eksangsri) මහතා ප්රධාන දේශනය පවත්වමින්, තායිලන්තයේ පුද්ගලික සෞඛ්ය ක්ෂේත්රය සංවර්ධනය වූ ආකාරය සහ රජය සමඟ එක්ව කටයුතු කිරීමේ වැදගත්කම පිළිබඳව කරුණු පැහැදිලි කළේය. ශ්රී ලංකාව සෞඛ්ය ආයෝජන සහ නවෝත්පාදන සඳහා ආකර්ෂණීය මධ්යස්ථානයක් බවට පත් කිරීමට අවශ්ය පසුබිම පිළිබඳව ද එහිදී වෛද්ය ලකිත් පීරිස් සහ රවීන් වික්රමසිංහ යන මහත්වරුන් සමඟ හමුවක් පැවැත්විණි. මෙම සමුළුවේ ප්රතිඵලයක් ලෙස ඉදිරි කාලය තුළ ක්රියාත්මක කිරීමට බලාපොරොත්තු වන නිර්දේශ ඇතුළත් විශේෂ ප්රකාශනයක් නිකුත් කිරීමට ද සංගමය සැලසුම් කර තිබේ.
පුද්ගලික අංශයේ දත්ත කළමනාකරණය ශක්තිමත් කිරීම, රෝගීන් සමඟ පවතින සන්නිවේදනය වඩාත් විධිමත් කිරීම සහ සේවා ගුණාත්මකභාවය නිරන්තරයෙන් නිරීක්ෂණය කිරීම සිය ප්රමුඛතාවක් වන බව APHNH සංගමය යළිත් අවධාරණය කළේය. ආරාධිතයන් සඳහා පමණක් සීමා වූ මෙම සමුළුව මෙරට සෞඛ්ය සේවාවේ අනාගත දිශානතිය තීරණය කරන සුවිශේෂී සන්ධිස්ථානයක් ලෙස සැලකේ. ශ්රී ලංකාවේ වර්තමාන සෞඛ්ය ප්රතිපත්තිවලට අනුකූලව පුද්ගලික අංශයේ දායකත්වය වඩාත් කාර්යක්ෂම කිරීමට මෙමගින් ලැබුණු පිටුවහල අතිමහත්ය.
