ලෝකප්රකට ඇපල් (Apple) සමාගමේ ප්රධාන විධායක නිලධාරී ටිම් කුක් (Tim Cook) විසින් මිනිසුන් සිය ස්මාර්ට් ජංගම දුරකථන දෙස බලා සිටින කාලය අඩු කර සොබාදහම සමඟ කාලය ගත කළ යුතු බවට කළ ප්රකාශය මේ වන විට සමාජ මාධ්ය ජාලාවල දැඩි උපහාසයට ලක්ව තිබේ. අද (2026 මාර්තු 25) දිනැති වාර්තාවලට අනුව ‘Good Morning America’ වැඩසටහන සමඟ පැවති සම්මුඛ සාකච්ඡාවකදී 65 හැවිරිදි ටිම් කුක් පවසා සිටියේ මිනිසුන් එකිනෙකාගේ දෑස් දෙස බලනවාට වඩා වැඩි කාලයක් දුරකථන තිර දෙස බලා සිටීම තමන් අනුමත නොකරන බවයි.
“මිනිසුන් අපේ දුරකථන ඕනෑවට වඩා භාවිතා කරනවාට මම කැමති නැහැ. දිගින් දිගටම දුරකථන තිරය මත ඇඟිලි යවමින් (Scrolling) මුළු දවසම ගත කිරීම සුදුසු නැහැ. පිටතට ගොස් සොබාදහම සමඟ කාලය ගත කරන්න,” යනුවෙන් ඔහු වැඩිදුරටත් සඳහන් කළේය. කෙසේ වෙතත් ලොව වැඩියෙන්ම අලෙවි වන අයිෆෝන් (iPhone) නිෂ්පාදනය කරන සමාගමක ප්රධානියා මෙවැනි ප්රකාශයක් කිරීම “මත්ද්රව්ය ජාවාරම්කරුවෙකු මත්ද්රව්යවලට ඇබ්බැහි නොවන්නැයි උපදෙස් දීමක්” වැනි යැයි අන්තර්ජාල පරිශීලකයින් පෙන්වා දෙති.
ස්මාර්ට් ෆෝන් භාවිතය නිසා ඇතිවන හුදකලාව, මානසික පීඩනය, නින්ද නොයාම සහ ළමුන්ගේ මතක ශක්තිය දුර්වල වීම වැනි අහිතකර බලපෑම් පිළිබඳව ලෝක අවධානය යොමුව ඇති පසුබිමක ටිම් කුක්ගේ මෙම ප්රකාශය දේශපාලන සහ තාක්ෂණික විචාරකයින් අතර ද විශාල විවාදයක් නිර්මාණය කර ඇත. දැනටමත් යුරෝපීය රටවල් කිහිපයක් පාසල් තුළ ස්මාර්ට් ෆෝන් තහනම් කිරීමට පියවර ගෙන ඇති අතර ඇපල් ප්රධානියාගේ මෙම “පරස්පර විරෝධී” අවවාදය තාක්ෂණික ලෝකයේ නවතම මාතෘකාව බවට පත්ව තිබේ.
