නවීන තාක්ෂණය පිළිබඳ ආතර් සී. ක්ලාක් ආයතනය විසින් පුරාවිද්යා ගවේෂණ කටයුතු සඳහා ඡායාරූප ලබා ගැනීමට 2016 වසරේදී රුපියල් එක් කෝටි පනස් හය ලක්ෂයක (මිලියන 15.6) වියදමින් මිලදී ගත් නියමුවන් රහිත ගුවන් යානය (Drone), 2024 අප්රේල් මාසය වන තෙක්ම කිසිදු ප්රයෝජනයකට ගෙන නොමැති බව ජාතික විගණන කාර්යාලය අනාවරණය කරයි. මෙම යානය පියාසර කරවීම සඳහා රුපියල් ලක්ෂයකට අධික මුදලක් වැය කර පියාසර බලපත්ර පවා ලබාගෙන තිබියදීත්, එය මෙලෙස භාවිතයට නොගෙන ගබඩා කර තිබීම සම්බන්ධයෙන් විගණන වාර්තාව මගින් දැඩි විවේචන එල්ල කර ඇත.
එමෙන්ම, දේශීය තාක්ෂණය සහ නවෝත්පාදන ප්රවර්ධනය කිරීම සඳහා රජයෙන් වෙන් කර ඇති ප්රතිපාදනවලින් රුපියල් කෝටි 13ක මුදලක් ආයතනයේ මූලික අරමුණුවලින් බැහැරව භාණ්ඩාගාර බිල්පත් සහ ස්ථාවර තැන්පතුවල ආයෝජනය කර තිබූ බව ද විගණන විමර්ශනවලදී හෙළි වී තිබේ. රාජ්ය ආයතනයක් ලෙස නව තාක්ෂණික අත්හදා බැලීම් සඳහා යෙදවිය යුතු මුදල් මෙලෙස බැංකු තැන්පතුවල රඳවා තබා ගැනීම මගින් රටේ නවෝත්පාදන ක්රියාවලියට සිදුව ඇති බාධාව පිළිබඳව ද එම වාර්තාව වැඩිදුරටත් පෙන්වා දෙයි.
