ඇමෙරිකාව සහ ඉරානය අතර පවතින ගැටුමට ස්ථාවර සහ ස්ථිර දේශපාලන විසඳුමක් සෙවීම සඳහා සාකච්ඡා අඛණ්ඩව පවත්වාගෙන යන ලෙසත්, සටන් විරාමය පූර්ණ වශයෙන් ක්රියාත්මක කරන ලෙසත් ආසියාන් (ASEAN) සංවිධානයේ විදේශ අමාත්යවරු අද (අප්රේල් 13) ඉල්ලා සිටියහ. අන්තර්ජාලය ඔස්සේ පැවැති විශේෂ හමුවකදී අමාත්යවරුන් අවධාරණය කළේ හෝමුස් සමුද්ර සන්ධිය හරහා නෞකා සහ ගුවන් යානා ගමනාගමනය සඳහා පවතින බාධා ඉවත් කර ආරක්ෂිත සහ අඛණ්ඩ ප්රවේශය යළි තහවුරු කළ යුතු බවයි.
මෙම ගැටුම හේතුවෙන් කලාපීය ස්ථාවරත්වයට මෙන්ම බලශක්ති සහ ආහාර සැපයුමට එල්ල වී ඇති බලපෑම් පිළිබඳව ද මෙහිදී දැඩි අවධානයක් යොමු කෙරිණි. සාමාජික රටවල් 11 කින් සමන්විත ආසියාන් සංවිධානය, චීනය, ජපානය සහ දකුණු කොරියාව සමඟ එක්ව ආහාර හිඟය සහ සැපයුම් ජාල බිඳ වැටීම්වලට විසඳුම් සෙවීමේ කලාපීය යාන්ත්රණය ශක්තිමත් කරන බව යළි තහවුරු කළේය.
මීට අමතරව, හදිසි අවස්ථාවලදී වේගයෙන් සම්බන්ධ විය හැකි විදේශ අමාත්යවරුන්ගේ සන්නිවේදන ප්රොටෝකෝලයක් (Crisis Communications Protocol) ස්ථාපිත කිරීමේ හැකියාව පිළිබඳව ද මෙහිදී සාකච්ඡා වී තිබේ. එළඹෙන මැයි මාසයේ පැවැත්වීමට නියමිත ආසියාන් රාජ්ය නායක සමුළුවේදී ද ආහාර හා බලශක්ති සුරක්ෂිතතාව පිළිබඳව ප්රධාන වශයෙන් සාකච්ඡා කිරීමට නියමිත බව මෙවර සභාපතිත්වය දරන පිලිපීනය සඳහන් කළේය.
