ඉරාන යුද්ධය තවත් සති දෙක තුනකින් අවසන් විය හැකි බවට අමෙරිකානු ජනාධිපති ඩොනල්ඩ් ට්රම්ප් (Donald Trump) සිදුකළ ප්රකාශයත් සමඟ අද (01) උදෑසන ආසියානු කොටස් වෙළඳපොළවල් කැපී පෙනෙන වර්ධනයක් පෙන්නුම් කළේය. විශේෂයෙන්ම ජපානයේ නිකේයි (Nikkei 225) දර්ශකය 4%කින් සහ දකුණු කොරියාවේ කොස්පි (Kospi) දර්ශකය 6%කට වඩා වැඩි අගයකින් ඉහළ ගොස් තිබේ.
ජනාධිපති ට්රම්ප් ඕවල් කාර්යාලයේ සිට ප්රකාශ කළේ, ඉරානය සමඟ එකඟතාවයකට පැමිණියද නැතත් නියමිත කාලසීමාව තුළ අමෙරිකාව එරටින් ඉවත් වන බවයි. මෙම ප්රකාශයත් සමඟ ආයෝජකයන් අතර යම් විශ්වාසයක් ගොඩනැගී ඇතත්, යුද්ධය ආරම්භ වූ පෙබරවාරි 28 දිනට පෙර පැවති මට්ටමට වඩා කොටස් වෙළඳපොළවල් තවමත් පහළ අගයක පවතී. මේ අතර බ්රෙන්ට් (Brent) බොරතෙල් මිල ද 1.2%කින් ඉහළ ගොස් බැරලයක් ඩොලර් 105 සීමාව පසු කර ඇත.
හෝමුස් සමුද්ර සන්ධිය අවහිර වීමත් සමඟ පසුගිය මාර්තු මාසයේදී ලෝක තෙල් මිල 64%කින් පමණ ඉහළ ගිය අතර, එය 1990 වසරෙන් පසු වාර්තා වූ ඉහළම මාසික මිල වැඩිවීම ලෙස සැලකේ. මැදපෙරදිග බලශක්තිය මත බෙහෙවින් යැපෙන ජපානය සහ දකුණු කොරියාව මෙම යුදමය වාතාවරණය නිසා දැඩි ආර්ථික බලපෑමකට ලක්ව ඇති අතර, අද රාත්රියේ ජනාධිපති ට්රම්ප් සිදු කිරීමට නියමිත විශේෂ ප්රකාශය දෙස ලෝක ආර්ථික ක්ෂේත්රය දැඩි අවධානයෙන් පසුවේ.
