මෙවර ෆෝමියුලා 1 (F1) තරඟ වාරය ආරම්භ කරමින් පැවැත්වෙන ඕස්ට්රේලියානු මහා පරිධි තරඟය සඳහා සහභාගී වන ප්රවීණ රේසිං රියදුරු ෆර්නැන්ඩෝ ඇලොන්සෝගේ කායික හා මානසික සෞඛ්යය පිළිබඳව ඇස්ටන් මාර්ටින් කණ්ඩායමේ ප්රධානී ඒඩ්රියන් නිව්වි සිය දැඩි කනස්සල්ල පළ කර තිබේ. ඇස්ටන් මාර්ටින් මෝටර් රථයේ හොන්ඩා එන්ජිමේ පවතින දෝෂයක් හේතුවෙන් රථය තුළ ඇති වන අධික කම්පනය මෙයට ප්රධාන හේතුව වී ඇත.
මෙම තත්ත්වය පිළිබඳව නිව්වි අනාවරණය කළ කරුණු අනුව, රථයේ පවතින අධික කම්පනය රියදුරුගේ ඇඟිලිවලට සෘජුවම බලපාන අතර එක දිගට වට 25කට වඩා ධාවනය කළහොත් ඇලොන්සෝගේ දෑත්වල ස්නායුවලට ස්ථිර හානි සිදුවිය හැකි බවට ඔහු අනතුරු අඟවා තිබේ. අනෙක් රියදුරු වන ලාන්ස් ස්ට්රෝල් පවසන්නේ තමන්ට වට 15කට වඩා දරාගත නොහැකි බවයි. කම්පනය කොතරම් ප්රබලද යත් රථයේ කණ්ණාඩි සහ පසුපස ලාම්පු පවා ගැලවී වැටෙන තත්ත්වයක් උද්ගත වී ඇති අතර මෙම ගැටලුව නිසා ඇලොන්සෝට පළමු පුහුණු වාරයට සහභාගී වීමට ද නොහැකි වී ඇත.
කෙසේ වෙතත්, 44 හැවිරිදි ඇලොන්සෝගේ මානසික ශක්තිය සහ ප්රතිචාර දැක්වීමේ වේගය තවමත් ඉතා ඉහළ මට්ටමක පවතින බව නිව්වි අවධාරණය කළේය. එන්ජිමේ දෝෂය නිවැරදි කරන තෙක් මෙවර තරඟ වාරයේ මුල් භාගය ඇස්ටන් මාර්ටින් කණ්ඩායමට ඉතා අභියෝගාත්මක වනු ඇතැයි විශ්වාස කෙරේ.
