හිටපු පාර්ලිමේන්තු මන්ත්රී අමරකීර්ති අතුකෝරල මහතා සහ ඔහුගේ ආරක්ෂක නිලධාරියා ඝාතනය කිරීමේ සිද්ධියට අදාළව ගම්පහ විශේෂ ත්රිපුද්ගල විනිසුරු මඬුල්ල ලබාදුන් තීන්දුව සම්බන්ධයෙන් සෑහීමකට පත් නොවන බව නීතිපති දෙපාර්තමේන්තුව නිවේදනය කරයි. මෙම නඩුවේ විත්තිකරුවන් 41 දෙනාගෙන් අවම වශයෙන් 31 දෙනෙකු හෝ වරදකරුවන් විය යුතු බවත්, තීන්දුවට එරෙහිව ශ්රේෂ්ඨාධිකරණය හමුවේ ප්රතිශෝධන අයැදුම්පතක් ගොනු කරන බවත් නියෝජ්ය සොලිසිටර් ජනරාල් ජනක බණ්ඩාර මහතා විනිසුරු මඬුල්ල හමුවේ ප්රකාශ කළේය.
මෙම නඩු තීන්දුව ප්රකාශයට පත් වූයේ විනිසුරු මඬුල්ලේ බෙදුණු තීරණයක් ලෙසය. එහි සභාපති විනිසුරු සහන් මාපා බණ්ඩාර මහතා සියලු විත්තිකරුවන් නිදොස් කොට නිදහස් කළ යුතු බවට තීන්දු කළද, සෙසු විනිසුරුවරුන් දෙදෙනා වූ රශ්මි සිංගප්පුලි සහ රෂන්ත ගොඩවෙල යන මහත්වරුන්ගේ බහුතර කැමැත්ත මත විත්තිකරුවන් 12 දෙනෙකුට මරණ දඬුවම නියම විය. තවත් සිවුදෙනෙකුට අත්හිටවූ සිරදඬුවම් සහ වන්දි ගෙවීමට නියම වූ අතර, සෙසු විත්තිකරුවන් 25 දෙනා නිදහස් කිරීමට ද්විත්ව විනිසුරු මඬුල්ල පියවර ගත්තේය.
