Snapchat සමාජ මාධ්ය ජාලය හරහා බාලවයස්කාර දරුවන් ලිංගික ගොදුරු බවට පත්කර ගැනීමට (Grooming) සහ අපරාධ ක්රියාවලට බඳවා ගැනීමට වැඩිහිටියන්ට අවස්ථාව ලැබී ඇති බවට සැක කරමින් යුරෝපා කොමිසම අද (2026 මාර්තු 26) නිල පරීක්ෂණයක් ආරම්භ කළේය. යුරෝපා සංගමයේ ඩිජිටල් සේවා පනතේ (DSA) සඳහන් ඉහළ ආරක්ෂණ ප්රමිතීන් Snapchat ආයතනය විසින් නොසලකා හැර ඇති බවට මෙහිදී චෝදනා එල්ල වී තිබේ.
2025 වසරේ දත්තවලට අනුව යුරෝපීයයන් මිලියන 94.5ක් පමණ Snapchat භාවිතා කරන අතර, එහි පවතින ගිණුම් සැකසුම් (Settings) මගින් ළමුන්ගේ ආරක්ෂාව තහවුරු කිරීමට අපොහොසත් වී ඇති බව යුරෝපා කොමිසම පෙන්වා දෙයි. විශේෂයෙන්ම වැඩිහිටියන් තරුණ පරිශීලකයන් ලෙස පෙනී සිටිමින් දරුවන් සමඟ සම්බන්ධ වී ඔවුන් නීති විරෝධී කටයුතුවලට පොළඹවා ගැනීම සහ ලිංගික සූරාකෑමට ලක් කිරීම පිළිබඳව බරපතල සැකයක් පවතින බව තාක්ෂණික ස්වෛරීභාවය පිළිබඳ විධායක උප සභාපති හෙනා විර්කුනන් (Henna Virkkunen) ප්රකාශ කළාය.
පින්තූර සහ වීඩියෝ දර්ශන නැරඹීමෙන් පසු ස්වයංක්රීයව මැකී යන තාක්ෂණය නිසා මෙවැනි අපරාධ පිළිබඳ සාක්ෂි සෙවීම අභියෝගයක් වී ඇති අතර, මෙම පරීක්ෂණය හරහා Snapchat සමාගමට දැඩි දඩ මුදලක් හෝ නව ආරක්ෂණ විධිවිධාන පැනවීමට ඉඩ ඇත.
