ලොව ප්රථම වතාවට වයස අවුරුදු 16න් පහළ දරුවන් සඳහා සමාජ මාධ්ය භාවිතය තහනම් කිරීමට ඕස්ට්රේලියාව ගත් තීරණයට දැන් මාස තුනක් සපිරී තිබේ. බ්රිතාන්යය වැනි රටවල් ද මෙම ආදර්ශය අනුගමනය කිරීමට සූදානම් වන පසුබිමක, මෙම තහනම කෙතරම් දුරට සාර්ථක වී ඇත්ද යන්න පිළිබඳව ලෝක අවධානය යොමුව ඇත. 2025 දෙසැම්බර් 10 වැනිදා සිට ක්රියාත්මක වූ මෙම නීතියට අනුව, TikTok, Instagram සහ Facebook වැනි ප්රධාන වේදිකා 10කින් ඕස්ට්රේලියානු ගිණුම් මිලියන 4.7ක් ඉවත් කිරීමට තාක්ෂණික සමාගම් පියවර ගෙන තිබේ. මෙය තාක්ෂණික වශයෙන් ලැබූ ජයග්රහණයක් ලෙස අග්රාමාත්ය ඇන්තනි ඇල්බනීස් හඳුන්වයි.
කෙසේ වෙතත්, මෙම තහනම දරුවන්ගේ මානසික සෞඛ්යයට බලපා ඇති ආකාරය පිළිබඳව නිශ්චිත දත්ත ලබා ගැනීමට තවමත් කල් වැඩි බව විද්යාඥයෝ පවසති. ඕස්ට්රේලියානු eSafety කොමසාරිස් ජූලි ඉන්මන් ග්රාන්ට් (Julie Inman Grant) විසින් මේ පිළිබඳව වසර දෙකක දීර්ඝකාලීන පර්යේෂණයක් ආරම්භ කර ඇති අතර, ඒ සඳහා දරුවන් සහ පවුල් 4,000කට අධික සංඛ්යාවක් සහභාගී කරවා ගැනීමට නියමිතය. මෙමගින් දරුවන්ගේ ඩිජිටල් පුරුදු, මානසික සෞඛ්යය සහ පවුල් සබඳතාවලට සිදුව ඇති බලපෑම විද්යාත්මකව තක්සේරු කිරීමට අපේක්ෂා කෙරේ.
තහනම ක්රියාත්මක වුවද, ඇතැම් දරුවන් විවිධ උපක්රම මගින් තවමත් සමාජ මාධ්ය භාවිතා කරන බව වාර්තා වේ. 14 හැවිරිදි සාරායි ඒඩීස් පවසන්නේ නව ගිණුම් සෑදීම තමන් සිතුවාට වඩා පහසු වූ බවයි. එහෙත් ග්රේස් ගුඕ වැනි තරුණියන් පවසන්නේ සමාජ මාධ්යවලින් බැහැර වීම නිසා විනෝදාස්වාදය ලබා ගැනීමට සහ සන්නිවේදනය කිරීමට වෙනත් සාර්ථක ක්රම පවතින බව තමන් වටහා ගත් බවයි. ඇතැම් දරුවන් Snapchat වැනි තහනම් යෙදුම් වෙනුවට තහනමට හසු නොවූ WhatsApp වැනි සන්නිවේදන මාධ්ය වෙත යොමු වී තිබේ.
විශේෂඥයන් පෙන්වා දෙන්නේ ඕනෑම ප්රතිපත්තියක් සකස් කිරීමේදී දරුවන්ගේ අදහස්වලට ද සවන් දීම අත්යවශ්ය බවයි. “The Anxious Generation” කෘතියේ කතුවරයා වන ජොනතන් හයිඩ්ට් පවසන්නේ, මෙම තහනම සාර්ථක වීමට නම් අවම වශයෙන් ජනගහනයෙන් 70%ක් එයට අවනත විය යුතු බවයි. එසේම, වසර පහක පමණ කාලයක් ගතවන තුරු මෙමගින් මානසික සෞඛ්ය ක්ෂේත්රයේ ඇතිවන සැබෑ වෙනස මැනිය නොහැකි බව ද ඔහු පෙන්වා දෙයි.
