ඔස්ට්රේලියාවේ නිව් සවුත් වේල්ස් ප්රාන්තයේ ඉදිවන දැවැන්ත දත්ත මධ්යස්ථාන ව්යාපෘති හේතුවෙන් සාමාන්ය නිවාසවල විදුලි සහ ජල බිල්පත් ඉහළ යාමේ දැඩි අවදානමක් පවතින බව එරට බලශක්ති සහ ජල උපයෝගිතා ආයතන අනතුරු අඟවයි. ඇමරිකානු ඩොලර් බිලියන 70 කට අධික ආයෝජනයකින් ඉදිවන මෙම මධ්යස්ථාන මගින් පද්ධතියට එල්ල කරන අධික පීඩනය පාලනය කිරීමට දැනට පවතින නීති ප්රමාණවත් නොවන බව එම ආයතන පෙන්වා දෙයි.
මයික්රොසොෆ්ට් (Microsoft) සහ ඇමසන් (Amazon) වැනි සමාගම් විසින් පවත්වාගෙන යන මෙම දත්ත මධ්යස්ථාන සිසිල් කිරීම සඳහා අධික ජල ප්රමාණයක් වැයවන අතර, එමගින් ප්රාන්තයේ ජල සුරක්ෂිතතාවයට ද තර්ජනයක් එල්ල වී තිබේ. විදුලිබල පද්ධතිය ක්රියාත්මක කරන ට්රාන්ස්ග්රිඩ් (Transgrid) ආයතනය පවසන්නේ, නව ව්යාපෘති සඳහා වැයවන අතිරේක පිරිවැය පියවා ගැනීමට සාමාන්ය පාරිභෝගිකයන්ගෙන් මුදල් අය නොකළ යුතු බවයි.
පසුගිය මාස 18 තුළ පමණක් දත්ත මධ්යස්ථාන සංවර්ධකයන්ගෙන් ලැබී ඇති විදුලි ඉල්ලුම ප්රාන්තයේ උපරිම විදුලි ඉල්ලුමෙන් අඩකටත් වඩා වැඩි අගයක් ගන්නා බව හෙළි වී තිබේ. මෙම තත්ත්වය හමුවේ දත්ත මධ්යස්ථාන සඳහා ජලය සහ විදුලිය ලබා දීමේදී දැඩි නියාමනයන් සහ සීමාවන් පැනවීමට රජයට දැඩි බලපෑමක් එල්ල වෙමින් පවතී.
