ඇමෙරිකාව, ඊශ්රායලය සහ ඉරානය අතර ඇති වූ සති දෙකක තාවකාලික සටන් විරාමය ඔස්ට්රේලියානු අගමැති ඇන්තනී ඇල්බනීස් (Anthony Albanese) මහතා අද (08) සාදරයෙන් පිළිගත්තේය. කෙසේ වෙතත්, ඇමෙරිකානු ජනාධිපති ඩොනල්ඩ් ට්රම්ප් විසින් යුද්ධය උත්සන්න කරමින් සිදු කරන ලද ප්රචණ්ඩකාරී ප්රකාශ තමා අනුමත නොකරන බව ද ඔහු මෙහිදී අවධාරණය කළේය.
හෝමුස් සමුද්ර සන්ධිය විවෘත නොකළහොත් “මුළු ශිෂ්ටාචාරයක්ම අද රාත්රියේ මිය යනු ඇතැයි” ට්රම්ප් කළ අනතුරු ඇඟවීම සම්බන්ධයෙන් අදහස් දැක්වූ අගමැතිවරයා, ඇමෙරිකානු ජනාධිපතිවරයෙකු එවැනි වචන භාවිත කිරීම නුසුදුසු බවත් එය දැඩි කනස්සල්ලට කරුණක් බවත් පවසා ඇත. මීට පෙර ඔස්ට්රේලියාව ඇතුළු රටවල් කිහිපයක් තමාට සහය නොදක්වන බවට ට්රම්ප් කළ චෝදනාව හමුවේ අගමැති ඇල්බනීස් මෙම ප්රකාශය නිකුත් කිරීම විශේෂත්වයකි.
