ලොව ඒකපුද්ගල සූදු පාඩුව (Gambling loss) වැඩිම රට වන ඕස්ට්රේලියාවේ සූදු වෙළෙඳ දැන්වීම් සීමා කිරීම සඳහා වූ දීර්ඝ කාලීන ප්රතිසංස්කරණ මාලාවක් එරට අග්රාමාත්ය ඇන්තනි ඇල්බනීස් (Anthony Albanese) අද (02) නිල වශයෙන් ප්රකාශයට පත් කළේය. වසර ගණනාවක මහජන පීඩනයෙන් පසුව හඳුන්වා දුන් මෙම නව නීති මගින් දරුවන් සූදුවට ඇබ්බැහි වීම වැළැක්වීම ප්රධාන අරමුණ වී තිබේ.
පෙරවරු 6:00 සිට පස්වරු 8:30 දක්වා කාලය තුළ රූපවාහිනී සූදු දැන්වීම් පැයකට උපරිම 3ක් දක්වා සීමා කර ඇති අතර, එම කාලය තුළ සජීවී ක්රීඩා විකාශන අතරතුර සූදු දැන්වීම් ප්රචාරය කිරීම සම්පූර්ණයෙන්ම තහනම් කර ඇත. පාසල් යන සහ එන වේලාවන්හිදී ගුවන් විදුලි දැන්වීම් තහනම් වන අතර, සූදු දැන්වීම් සඳහා ප්රසිද්ධ පුද්ගලයන් (Celebrities) හෝ ක්රීඩකයන් යොදා ගැනීම ද මින් ඉදිරියට තහනම් වේ. එමෙන්ම ක්රීඩා පිටි තුළ සහ ක්රීඩකයන්ගේ නිල ඇඳුම් මත සූදු ආයතනවල දැන්වීම් ප්රදර්ශනය කිරීම ද නව නීතිය යටතේ තහනම් කර තිබේ.
අග්රාමාත්යවරයා අවධාරණය කළේ වැඩිහිටියන්ට සිය කැමැත්ත පරිදි සූදුවේ නිරත වීමට ඇති අයිතියට බාධා නොකරමින්, දරුවන් මෙම ප්රචාරණයන්ගෙන් ආරක්ෂා කර ගැනීම සඳහා මෙම සමබර තීරණය ගත් බවයි. මෙම පියවර හරහා නීති විරෝධී විදේශීය සූදු වෙබ් අඩවි මෙන්ම පෝකර් යන්ත්ර (Poker machines) ආකාරයෙන් ක්රියාත්මක වන ජංගම යෙදවුම් ද මර්දනය කිරීමට ඕස්ට්රේලියානු රජය සැලසුම් කර ඇත.
