චැම්පියන්ස් ලීග් අර්ධ අවසන් පූර්ව වටයේ පළමු තරගයේදී ඇට්ලෙටිකෝ මැඩ්රිඩ් හමුවේ ගෝල 2-0ක් ලෙස ලැබූ පරාජය සම්බන්ධයෙන් බාර්සිලෝනා පාපන්දු සමාජය යුරෝපීය පාපන්දු සම්මේලනය (UEFA) වෙත නිල පැමිණිල්ලක් ඉදිරිපත් කර තිබේ. තරගය අතරතුර වීඩියෝ සහාය විනිසුරු (VAR) පද්ධතිය නිසි ලෙස ක්රියාත්මක නොවීම සහ තීරණාත්මක අවස්ථාවකදී මැදිහත් නොවීම හේතුවෙන් තරගයේ ප්රතිඵලයට සෘජු බලපෑමක් එල්ල වූ බව බාර්සිලෝනා බලධාරීන් පෙන්වා දෙයි. විශේෂයෙන්ම තරගයේ 54 වන මිනිත්තුවේදී ඇට්ලෙටිකෝ මැඩ්රිඩ් ආරක්ෂක ක්රීඩක මාර්ක් පුබිල් විසින් තම දඬුවම් කලාපය තුළ පන්දුව අතින් ස්පර්ශ කළ ද, ඒ සඳහා දඬුවම් පහරක් ලබා නොදීම පිළිබඳව ඔවුන් දැඩි විරෝධය පළ කර ඇත.
බාර්සිලෝනා කණ්ඩායමේ කළමනාකරු හාන්සි ෆ්ලික් පවසන්නේ ප්රතිවාදී ගෝල රකින්නා ක්රීඩාව ආරම්භ කිරීමෙන් පසු ආරක්ෂක ක්රීඩකයා පන්දුව අතින් නැවැත්වීම පැහැදිලි දඬුවම් පහරක් ලැබිය යුතු වරදක් බවයි. එසේම එම වරද සිදු කළ ක්රීඩකයාට දෙවන කහ කාඩ්පතක් ද හිමි විය යුතු බව ඔහු පෙන්වා දෙයි. මීට අමතරව බාර්සිලෝනා ක්රීඩක පෝ කුබාර්සි හට රතු කාඩ්පතක් පෙන්වා පිටියෙන් ඉවත් කිරීමට VAR පද්ධතිය මැදිහත් වුවද, තම කණ්ඩායමට වාසිදායක විය යුතු අවස්ථාවේදී එය නිහඬව සිටීම පක්ෂපාතී ක්රියාවක් බවට ද චෝදනා එල්ල වී තිබේ.
මෙම සිදුවීම සම්බන්ධයෙන් විධිමත් පරීක්ෂණයක් පවත්වන ලෙසත්, විනිසුරුවන් අතර සිදුවූ සන්නිවේදනයට ප්රවේශය ලබා දෙන ලෙසත් බාර්සිලෝනා සමාජය UEFA වෙතින් ඉල්ලා ඇත. ජූලියන් අල්වාරස් සහ ඇලෙක්සැන්ඩර් සෝර්ලොත් ලබාගත් ගෝල හේතුවෙන් ඇට්ලෙටිකෝ මැඩ්රිඩ් කණ්ඩායම තරගය ජයග්රහණය කළ අතර, මෙම විනිසුරු තීරණ පිළිබඳ මතභේදය ඉදිරි දෙවන අදියරේ තරගය සඳහා ද දැඩි උණුසුමක් එක් කරනු ඇතැයි ක්රීඩා විචාරකයෝ අපේක්ෂා කරති.
