රුපියල් 30,000ක මුදලක් සහ මත්පැන් බෝතලයක් අල්ලස් වශයෙන් ඉල්ලා ලබාගැනීමේ චෝදනාව මත අත්අඩංගුවට ගෙන සිටි බීට්ටු වන නිලධාරියෙකු ඇප මත මුදා හැරීමට කොළඹ ප්රධාන මහේස්ත්රාත් අසංග එස්. බෝදරගම මහතා අද (20) නියෝග කළේය.
සැකකාර නිලධාරියා රුපියල් ලක්ෂ 5 බැගින් වූ ශරීර ඇප දෙකක් මත මුදා හැරීමට නියම වූ අතර, ඔහුට විදෙස් ගමන් තහනමක් ද පැනවීමට අධිකරණය පියවර ගත්තේය. අල්ලස් හෝ දූෂණ චෝදනා විමර්ශන කොමිෂන් සභාව විසින් සැකකරු අධිකරණයට ඉදිරිපත් කිරීමෙන් අනතුරුව මෙම නියෝගය නිකුත් විය.
අල්ලස් කොමිසම අධිකරණයට දන්වා සිටියේ හුලංනුගේ ප්රදේශයේ පදිංචි පුද්ගලයෙකු විසින් කරන ලද පැමිණිල්ලකට අනුව මෙම වැටලීම සිදු කළ බවයි. අදාළ පැමිණිලිකරුගේ ඉඩමකට මායිම්ව පිහිටි ‘නෙළු වැවයාය’ රක්ෂිතයට අයත් කොටසක වගා කටයුතු සිදු කිරීම සම්බන්ධයෙන් නීතිමය පියවර නොගෙන සිටීම සඳහා මෙම නිලධාරියා අල්ලස් ඉල්ලා ඇති බව විමර්ශනවලදී අනාවරණය වී තිබේ.
අල්ලස් කොමිසම විසින් අත්අඩංගුවට ගත් මෙම නිලධාරියා රක්ෂිත බන්ධනාගාරගත කර සිටි අතර, ඉදිරිපත් වූ කරුණු සලකා බැලූ මහේස්ත්රාත්වරයා නඩුව නැවත කැඳවන තෙක් ඔහු ඇප මත මුදා හැරීමට තීරණය කළේය.
