ඊශ්රායල ගුවන් හමුදාව විසින් බේරූට් නුවර දකුණුදිග තදාසන්න ප්රදේශ (Southern Suburbs) ඉලක්ක කර එල්ල කරන ලද මාරක ප්රහාරවලින් පසු, අද (02) රාත්රියේ එම ප්රදේශවල මහා මාර්ග දැඩි වාහන තදබදයකින් (Gridlock) අඩපණ වී ඇති බව විදෙස් මාධ්ය වාර්තා කරයි. හිස්බුල්ලා බලකොටුවක් ලෙස සැලකෙන ‘දහියෙහ්’ ප්රදේශයෙන් ඉවත් වීමට උත්සාහ කරන දහස් සංඛ්යාත සිවිල් වැසියන්ගේ වාහනවලින් මාර්ග පිරී පවතින අතර, රතු පැහැති පසුපස ලාම්පු ධාරාවන් ක්ෂිතිජය දක්වාම විහිදී ඇති අයුරු දැක්වෙන වීඩියෝ දර්ශන සමාජ මාධ්ය හරහා ප්රචාරය වෙමින් පවතී. ගොඩනැගිලිවලින් නැගෙන ගිනි ජාලා සහ කළු දුමාරය මධ්යයේ සිය පවුල් සහ අත්යවශ්ය දේපළ ද රැගෙන ආරක්ෂිත ස්ථාන සොයා යන ජනතාව හේතුවෙන් නගරයේ ප්රධාන මාර්ග සියල්ලම පාහේ බම්පර් එකට වැදෙන මට්ටමට (Bumper-to-Bumper) වාහනවලින් පිරී ගොස් තිබේ.
ලෙබනනයේ ආරක්ෂක තත්ත්වය සීඝ්රයෙන් පිරිහීම හමුවේ ඇමරිකාව සිය තානාපති කාර්යාලයේ අත්යවශ්ය නොවන සේවකයන්ට වහාම රටින් පිටවන ලෙස නියෝග කර ඇති අතර, අනෙකුත් යුරෝපා රටවල් ද සිය පුරවැසියන්ට ලෙබනනයෙන් ඉවත් වන ලෙස දන්වා තිබේ. ඊශ්රායලයේ ‘රෝරිං ලයන්’ මෙහෙයුම යටතේ එල්ල වන මෙම ප්රහාර හමුවේ බේරූට් වැසියන් දැඩි භීතියට පත්ව සිටින අතර, පවතින දැවැන්ත වාහන තදබදය හේතුවෙන් ගිලන් රථ සහ සහන සේවා කණ්ඩායම්වලට පවා ප්රහාරයට ලක්වූ ස්ථාන කරා ළඟාවීම දැඩි අභියෝගයක් වී ඇත. ලෙබනන් රජය පවසන්නේ පවතින යුදමය වාතාවරණය හේතුවෙන් රටේ ප්රධාන ගුවන් තොටුපළ ද තාවකාලිකව වසා දැමීමට සිදුවිය හැකි බවයි.
