ඉන්දියාවේ ඇසෑම් ප්රාන්ත සභා මැතිවරණය වෙනුවෙන් භාරතීය ජනතා පක්ෂයේ (BJP) ‘සංකල්ප් පත්ර’ (Sankalp Patra) ප්රතිපත්ති ප්රකාශය ඉන්දීය මුදල් අමාත්ය නිර්මලා සීතාරාමන් මහත්මිය විසින් අද (31) එළිදක්වන ලදී. මෙහි ප්රධානතම පොරොන්දුවක් වන්නේ ඉදිරි වසර කිහිපය තුළ ඇසෑම් ප්රාන්තයේ යටිතල පහසුකම් සංවර්ධනය සඳහා ඉන්දීය රුපියල් ට්රිලියන 5ක (රුපියල් ලක්ෂ 50,000ක) දැවැන්ත ආයෝජනයක් සිදු කිරීමයි.
ප්රතිපත්ති ප්රකාශයට ඇතුළත් ප්රධාන කරුණු 31 අතර ඇසෑම් වැසියන්ගේ ඉඩම්, උරුමය සහ ගෞරවය ආරක්ෂා කිරීම සඳහා විශේෂ වැඩපිළිවෙළක් ක්රියාත්මක කිරීම ඇතුළු ස්වදේශික අයිතීන් සුරැකීමේ පොරොන්දුව ප්රමුඛ වේ. එසේම බංග්ලාදේශ “මියා” (Miya) වැසියන් විසින් අත්පත් කරගෙන ඇති රජයේ ඉඩම් යළි අත්පත් කර ගැනීම සහ ප්රාන්තය පුරා “එකම සිවිල් නීති පද්ධතියක්” (Uniform Civil Code) හඳුන්වා දීමට ද පක්ෂය මෙහිදී යෝජනා කර ඇත. තවද තරුණ තරුණියන් සඳහා වැඩි රැකියා අවස්ථා නිර්මාණය කිරීම සහ ප්රාන්තයේ ස්ථාවරත්වය තහවුරු කිරීම කෙරෙහි ද මෙහිදී අවධානය යොමු කර තිබේ.
මෙහිදී අදහස් දැක්වූ නිර්මලා සීතාරාමන් මහත්මිය ප්රකාශ කළේ කොන්ග්රස් පක්ෂයට වසර 60කින් කළ නොහැකි වූ සංවර්ධනයක් පසුගිය දශකය තුළ BJP පාලනය යටතේ ඇසෑම් ප්රාන්තයේ සිදුව ඇති බවයි. වත්මන් ඇසෑම් ප්රාන්තයේ පවතින සාමය සහ ස්ථාවරත්වය හේතුවෙන් විදේශ රටවල සේවය කළ ඇසෑම් තරුණ තරුණියන් පවා යළි සිය ප්රාන්තයට පැමිණෙමින් සිටින බව ඇය වැඩිදුරටත් අවධාරණය කළාය.
