බොරැල්ල පොලිස් ස්ථානයේ නඩු භාණ්ඩ කාමරයේ තැන්පත් කර තිබූ නඩු භාණ්ඩ අතරින් රුපියල් 500ක මුදලක් සොරකම් කිරීමේ සිද්ධියකට අදාළව විශ්රාමික පොලිස් පරීක්ෂකවරයෙකු කොළඹ දකුණ කොට්ඨාස අපරාධ විමර්ශන අංශය මගින් අත්අඩංගුවට ගෙන තිබේ.
2023 වසරේ සිදු කරන ලද විගණන වාර්තාවකට අනුව බොරැල්ල පොලිසියේ නඩු භාණ්ඩ කාමරයේ තිබූ නඩු භාණ්ඩ 57ක් අතුරුදන් වී ඇති බව අනාවරණය වී ඇත. අත්අඩංගුවට ගත් සැකකරු මීට දින 51කට පෙර සම්මන්තුරේ පොලිස් ස්ථානයේ සේවය කරමින් සිටියදී විශ්රාම ලැබූ අයෙකු බව පොලිසිය පවසයි.
මෙම අපරාධයටම සම්බන්ධ බවට සැකපිට මීට පෙරද බොරැල්ල පොලිසියේ සේවය කළ පොලිස් පරීක්ෂකවරයෙකු, උප පොලිස් පරීක්ෂකවරයෙකු සහ පොලිස් සැරයන්වරුන් තිදෙනෙකු කොළඹ දකුණ කොට්ඨාස අපරාධ විමර්ශන අංශය මගින් අත්අඩංගුවට ගෙන අධිකරණයට ඉදිරිපත් කර තිබුණි.
