ජාත්යන්තර මත්ද්රව්ය සහ අවි ජාවාරම් මැඩලීම සඳහා බ්රසීල රජය සහ අමෙරිකා එක්සත් ජනපදය අතර නව ආරක්ෂක සහයෝගීතාවක් ප්රකාශයට පත් කර තිබේ. බ්රසීල ජනාධිපති ලුයිස් ඉනාසියෝ ලූලා ද සිල්වා මහතා පෙන්වා දෙන්නේ මෙය රටවල් දෙකේ බදු සහ රේගු අංශ අතර ඇති වූ සුවිශේෂී සබඳතාවක් බවයි. “DESARMA” ලෙස නම් කර ඇති මෙම වැඩසටහන හරහා තත්කාලීන දත්ත හුවමාරු කර ගැනීම, භාණ්ඩ ප්රවාහනය දැඩි ලෙස නිරීක්ෂණය කිරීම සහ නීතිවිරෝධී නැව්ගත කිරීම් වැටලීම සඳහා ඒකාබද්ධ මෙහෙයුම් ක්රියාත්මක කිරීමට නියමිතය.
පසුගිය මාස 12 තුළ පමණක් අමෙරිකාවේ ෆ්ලොරිඩා ප්රාන්තයේ සිට නීතිවිරෝධී ලෙස බ්රසීලයට රැගෙන ආ ගිනිඅවි සහ ඒවායේ කොටස් 1,168ක් අත්අඩංගුවට ගෙන ඇති බව බ්රසීල රජය අනාවරණය කරයි. මෙම අවි ආයුධ බ්රසීලයේ අපරාධ කල්ලි අතට පත්වන බවට හඳුනාගෙන තිබේ. කෙසේ වෙතත්, ලතින් ඇමෙරිකානු අපරාධ කල්ලි “විදේශීය ත්රස්තවාදී සංවිධාන” ලෙස නම් කිරීමට අමෙරිකානු ජනාධිපති ඩොනල්ඩ් ට්රම්ප් ගෙන ඇති තීරණයට ලූලා රජය සිය විරෝධය පළ කර ඇති අතර, දෙරටේ ස්වෛරීභාවයට ගරු කරමින් අපරාධ මර්දනය කළ යුතු බව අවධාරණය කරයි.
