බ්රසීලයේ සිට සිය දෙමාපියන් සමඟ ලන්ඩන් නුවර සංචාරයකට පැමිණ සිටි එමානුවෙලි රොඩ්රිගස් (Emanuelly Rodrigues) නමැති වයස අවුරුදු එකක දැරියක්, පලතුරක් අනුභව කිරීමට යාමේදී සිදුවූ අනතුරක් හේතුවෙන් මේ වන විට ජීවිතයත් මරණයත් අතර සටනක නිරතව සිටී. පසුගිය පෙබරවාරි 3 වනදා සිදුවූ මෙම සිදුවීමේදී ස්ට්රෝබෙරි කැබැල්ලක් ඇයගේ උගුරේ සිරවී ඇති අතර, විනාඩි 30ක් පමණ මොළයට ඔක්සිජන් නොලැබීම නිසා ඇයගේ මොළයට “විනාශකාරී” හානි සිදුව ඇති බව වෛද්යවරු පවසති.
අනතුර සිදුවන අවස්ථාවේදී දැරිය බලාගන්නා තැනැත්තිය (Babysitter) ඇයව බේරා ගැනීමට උත්සාහ කළද එය අසාර්ථක වී ඇති අතර, පසුව එම මාර්ගයේ ගමන් කළ වෛද්ය ශිෂ්යයෙකුගේ සහාය ඇතිව ඇයව වොට්ෆර්ඩ් (Watford) රෝහලට ඇතුළත් කර තිබේ. එහිදී ඇයගේ හෘද ස්පන්දනය නතර වී තිබූ බැවින් වෛද්යවරුන් දැඩි උත්සාහයකින් ඇයව යථා තත්ත්වයට පත් කර ගෙන ඇත. දින අටක් කෘතිම සිහිනැති කිරීමකට (Induced Coma) ලක් කර සිටි මෙම දැරියට දැන් පෙනීම අහිමි වී ඇති අතර, කතා කිරීමට හෝ ඇවිදීමට නොහැකිව නල මගින් ආහාර ලබා දෙමින් පවතී.
දැරියගේ පියා වන 23 හැවිරිදි ලුයිස් රොඩ්රිගස් පවසන්නේ තම දියණිය මේ වන විට දැඩි වේදනාකාරී මාංශ පේශි පෙරළීම් (Dystonia) සහ හුස්ම ගැනීමේ අපහසුතාවලින් පෙළෙන බවයි. මෙම පවුල සංචාරක වීසා මත එක්සත් රාජධානියේ රැඳී සිටින බැවින් සහ ඔවුන් සතුව වලංගු වෛද්ය රක්ෂණයක් නොමැති වීම නිසා, දැරියට අවශ්ය විශේෂිත ස්නායු පුනරුත්ථාපන (Neuro-rehabilitation) ප්රතිකාර ලබා ගැනීමට දැඩි බාධාවක් එල්ල වී තිබේ.
දැරියට අවශ්ය ප්රතිකාර සඳහා අරමුදල් රැස් කිරීමට GoFundMe පිටුවක් ආරම්භ කර ඇති අතර, ඒ හරහා මේ වන විට පවුම් 4,600කට අධික මුදලක් එකතු වී ඇත. දැරිය සාමාන්ය ගුවන් යානයකින් බ්රසීලය බලා රැගෙන යාමට තරම් සෞඛ්ය තත්ත්වයක නොමැති බැවින්, ඇයව ලන්ඩන් නුවර රෝහලක රඳවාගෙන ප්රතිකාර කිරීමට අවශ්ය වීසා කාලය දීර්ඝ කර ගැනීමට දෙමාපියන් මේ වන විට උත්සාහ කරමින් සිටිති. “ඇය සැබෑ සටන්කාරියක් සහ ආශ්චර්යයක්” යැයි පවසන ඇයගේ පියා, තම දියණිය යථා තත්ත්වයට පත් වනු ඇතැයි දැඩි විශ්වාසයකින් පසුවෙයි.
