ඉරානය වෙත අමෙරිකානු සහ ඊශ්රායල ප්රහාර එල්ල වීමත් සමඟ මැදපෙරදිග කලාපය දැඩි යුදමය වාතාවරණයකට පත්වීම හේතුවෙන් ලෝක වෙළඳපොළේ බොරතෙල් මිල (Brent crude) 10%කින් පමණ ඉහළ ගොස් තිබේ. ඒ අනුව බොරතෙල් බැරලයක මිල මේ වන විට ඇමෙරිකානු ඩොලර් 80 සීමාවට පැමිණ ඇති අතර, පවතින අර්බුදය හමුවේ එය ඩොලර් 100 සීමාව ඉක්මවා යා හැකි බවට ආර්ථික විශ්ලේෂකයෝ අනතුරු අඟවති. යුදමය ප්රහාරවලට අමතරව තෙල් මිල ඉහළ යාමට බලපාන ප්රධානතම සාධකය වී ඇත්තේ හෝමුස් සමුද්ර සන්ධිය හරහා සිදුකෙරෙන නාවික ප්රවාහන කටයුතු අඩාල වීමයි.
ගෝලීය තෙල් සැපයුමෙන් 20%කට වඩා වැඩි ප්රමාණයක් ප්රවාහනය කරනු ලබන හෝමුස් සමුද්ර සන්ධිය හරහා ගමන් නොකරන ලෙස ඉරානය විසින් නෞකාවලට අනතුරු ඇඟවීමක් කර ඇත. මේ හේතුවෙන් බොහෝ ප්රධාන තෙල් සමාගම්, නැව් හිමියන් සහ වෙළඳ ආයතන එම මුහුදු මාර්ගය ඔස්සේ බොරතෙල්, ඉන්ධන සහ ද්රව ස්වභාවික වායු (LNG) ප්රවාහනය තාවකාලිකව අත්හිටුවා තිබේ. මෙම අවහිරතාවය දිගින් දිගටම පැවතුණහොත් දිනකට බොරතෙල් බැරල් මිලියන 8 සිට 10 දක්වා ප්රමාණයක් ගෝලීය සැපයුමෙන් අහිමි වනු ඇතැයි ගණන් බලා ඇත.
පවතින බලශක්ති අර්බුදයට පිළියමක් ලෙස ‘OPEC+’ සංවිධානය එළඹෙන අප්රේල් මාසයේ සිට දිනකට බොරතෙල් බැරල් 206,000කින් නිෂ්පාදනය ඉහළ නැංවීමට එකඟ වී ඇති නමුත්, එය ගෝලීය ඉල්ලුමෙන් 0.2%ක් වැනි ඉතා සුළු ප්රතිශතයකි. මේ අතර, මැදපෙරදිග අර්බුදය හමුවේ ආසියානු රටවල් සහ තෙල් පිරිපහදු මධ්යස්ථාන සිය ඉන්ධන සංචිත පිළිබඳව නැවත ඇගයීමක නිරත වෙමින් විකල්ප සැපයුම් මාර්ග සහ ප්රභවයන් සොයා බැලීමට කටයුතු කරමින් සිටියි.
