බස් ගාස්තු සංශෝධනයක් ඉල්ලා පෞද්ගලික බස් සංගම් කිහිපයක් අද (23) උදෑසන සිට ධාවනයෙන් ඉවත් වීම නිසා දිවයින පුරා මගී ප්රවාහන කටයුතු දැඩි ලෙස අඩාල වී තිබේ. සතියේ පළමු වැඩ කරන දිනය වූ අද උදෑසන කාර්යාල සේවකයින් සහ පාසල් දරුවන් බස් නැවතුම්පොළවල් ආශ්රිතව පැය ගණනාවක් පෝලිම්වල රැඳී සිටිනු දක්නට ලැබුණි.
ඉන්ධන මිල ඉහළ යාමට සාපේක්ෂව බස් ගාස්තු සංශෝධනයක් ඊයේ (22) දිනයේදීම ලබාදෙන ලෙස බස් සංගම් ඉල්ලා සිටියද, එය ඉටු නොවීම මෙම වෘත්තීය ක්රියාමාර්ගයට හේතුවී ඇත. ජාතික ගමනාගමන කොමිෂන් සභාව (NTC) පෙන්වා දෙන්නේ ඩීසල් මිල ඉහළ යාම නිසා බස් ගාස්තු සූචිය 10%ක සීමාව ඉක්මවා ගොස් ඇති බවයි. මේ සම්බන්ධයෙන් වන කැබිනට් පත්රිකාව අද දිනයේදී අනුමැතිය සඳහා ඉදිරිපත් කිරීමට නියමිත අතර, එතෙක් ධාවනයෙන් ඉවත්ව සිටින බව බස් සංගම් අවධාරණය කරයි.
බස් රථ නඩත්තු වියදම් සහ ඉන්ධන සඳහා වැයවන අතිවිශාල පිරිවැය හමුවේ පැරණි ගාස්තුවට ධාවනය කිරීම පාඩු ලැබීමක් බව බස් හිමියන් පවසති. මෙම තත්ත්වය හමුවේ දුම්රිය සහ ලංගම බස් රථ සඳහා අද උදෑසන අසීමිත ජනකායක් රොක් වී සිටි අතර, පවතින උණුසුම් කාලගුණ තත්ත්වය හමුවේ මගීන් දැඩි අපහසුතාවකට පත්ව සිටී.
