චීන තාක්ෂණික යෝධයකු වන බයිට්ඩාන්ස් සමාගම සිය ‘සීඩාන්ස්’ (Seedance) කෘතිම බුද්ධි වීඩියෝ මෙවලම මගින් සිදුවන ප්රකාශන හිමිකම් උල්ලංඝනය කිරීම් පාලනය කිරීමට පොරොන්දු වී තිබේ. මෙය සිදුවූයේ ඩිස්නි සමාගම ඇතුළු හොලිවුඩ් චිත්රාගාර රැසක් එල්ල කළ දැඩි විවේචන සහ නෛතික ක්රියාමාර්ග ගැනීමේ තර්ජන හමුවේය. මෑතකදී නිකුත් වූ සීඩාන්ස් 2.0 සංස්කරණය හරහා ‘ස්ටාර් වෝර්ස්’ සහ ‘මාවල්’ වැනි සිනමා නිර්මාණවල චරිත යොදාගනිමින් අතිශය තාත්වික වීඩියෝ නිර්මාණය කිරීමට පරිශීලකයන්ට අවස්ථාව ලැබී තිබූ අතර, ඩිස්නි සමාගම චෝදනා කරන්නේ බයිට්ඩාන්ස් සමාගම සිය බුද්ධිමය දේපළ “විකෘති කරමින් කොල්ලකන” බවයි.
තම සමාගම බුද්ධිමය දේපළ අයිතීන් කෙරෙහි ගරු කරන බවත්, පවතින ගැටලු විසඳීම සඳහා ආරක්ෂිත පියවර ශක්තිමත් කරන බවත් බයිට්ඩාන්ස් සමාගම බීබීසී පුවත් සේවයට ප්රකාශ කර ඇත. හොලිවුඩ් ස්ටූඩියෝවලට අමතරව, ජපන් සජීවිකරණ චරිත (Anime) අනවසරයෙන් භාවිත කිරීම සම්බන්ධයෙන් ජපාන රජය ද මේ වන විට විමර්ශනයක් ආරම්භ කර තිබේ. කෘතිම බුද්ධි තාක්ෂණය සහ ප්රකාශන හිමිකම් අතර පවතින මෙම ගැටුම මීට පෙර මිඩ්ජර්නි (Midjourney) වැනි මෙවලම්වලට ද නඩු පැවරීමට හේතු වූ අතර, එම නීතිමය අර්බුද තවමත් විසඳී නොමැත.
