අඩු ආදායම්ලාභී පවුල් 50,000කට හිමිකම් ඔප්පු ලබා දීමේ වැඩපිළිවෙල යටතේ නිවාස වල පූර්ණ අයිතිය පැවරීමේ දී මුල් ප්‍රතිලාභියා මරණයට පත්ව ඇත්නම් දැනට නිවසේ පදිංචි ඔහුගේ උරුමකරුවන්ට හිමිකම් ඔප්පු ලබා දීමට කැබිනට් අනුමැතිය හිමිවේ.

නාගරික සංවර්ධන හා නිවාස ඇමති ප්‍රසන්න රණතුංග මහතා විසින් ඉදිරිපත් කරනු ලැබූ කැබිනට් පත්‍රිකාවට අනුව කැබිනට් මණ්ඩලය මෙම තීරණයට එළඹ තිබේ.

හිමිකම් ඔප්පු ලබා දීමේ දී වැය වන නොතාරිස් ගාස්තු, මුද්දර හා වෙනත් බදු වලින් නිවාස හිමියන් නිදහස් කිරීමට ද කැබිනට් අනුමැතිය හිමි වෙයි. ඒ අනුව අදාළ නොතාරිස් ගාස්තු, මුද්දර හා වෙනත් බදු මුදල් මහා භාණ්ඩාගාරය විසින් දැරීමට නියමිතයි.

ජනාධිපති රනිල් වික්‍රමසිංහ මහතා 2024 අයවැය යෝජනා මගින් නාගරික නිවාස හිමිකම යටතේ අඩු ආදායම්ලාභී නිවාස හිමියන් 50,000කට නිවාස හිමිකම් ඔප්පු ලබා දීමට යෝජනා කර තිබිණි.

මීට අදාළව ඇමති ප්‍රසන්න රණතුංග මහතා පසුගිය ජනවාරි 04 වනදා කැබිනට් පත්‍රිකාවක් ඉදිරිපත් කර තිබූ අතර ඊට සිය නිරීක්ෂණ ඉදිරිපත් කරමින් නීතිපතිවරයා සදහන් කර තිබුණේ මෙම හිමිකම් ඔප්පු ප්‍රදානයේදී නිවාසවල පදිංචි එක් පාර්ශවයකට අගතියක් සිදු විය හැකි බවයි.

මෙම නිවාස වල පදිංචි ඇතැමුන් පසුගිය දෙසැම්බර් 31 වන දින සිට ගෙවිය යුතු නියමිත කුලී මුදල ගෙවා අවසන්ව ඇත. ඇතමුන් එලෙස ගෙවා අවසන්ව නොමැති නිසා අදාළ කාලයේ නියමිත කුලී මුදල සම්පූර්ණයෙන්ම ගෙවා අවසන්ව ඇති අයට මෙම අගතිය සිදුවිය හැකි බව නීතිපතිවරයා සිය නිරීක්ෂණ මගින් පෙන්වාදී තිබිණ.

ඒ අනුව විෂය භාර ඇමති ප්‍රසන්න රණතුංග මහතා පසුගිය අප්‍රේල් මස අගදී නීතිපතිවරයාගේද නීරීක්ෂණ සැලකිල්ලට ගනිමින් කැබිනට් පත්‍රිකාවක් ඉදිරිපත් කළ අතර එමගින් යෝජනා කර තිබුණේ පසුගිය දෙසැම්බර් 31 වන දින වන විට නියමිත පරිදි කුලී මුදල් ගෙවා ඇති නිවාස හිමියන්ට ඔප්පු ලබා දීමේ දී ප්‍රමුඛතාවය ලබා දීමටයි. අනෙකුත් අයට අදාළ කාලසීමාව සදහා අය විය යුතු කුලී මුදල ගෙවා සම්පූර්ණ වූ පසු ඔප්පු ලබා දීමටත් මෙමගින් යෝජනා කර තිබුණි.

එමෙන්ම අඩු ආදායම්ලාභී නිවාස වල පුර්ණ අයිතිය පැවරීමෙන් පසු එම මහල් නිවාසවල නඩත්තු කටයුතු සහාධිපත්‍ය කළමනාකරණ අධිකාරිය විසින් පත් කර ඇති සහාධිපත්‍ය කළමණාකරණ සංස්ථා වෙත පැවරීමටද නියමිතය.

ඒ සදහා නිධන් අරමුදලක් (Stinting fund) ඇති කිරීමටද අපේක්ෂා කරන අතර ඒ සදහා එක් නිවසක් වෙනුවෙන් රුපියල් 50,000ක් බැගින් නිවාස ඒකක 12,230ක් සදහා රුපියල් මිලියන 611.5ක මුදලක් මහා භාණ්ඩාගාරයෙන් ලබා දෙන ලෙසද ඇමතිවරයා කැබිනට් මණ්ඩලයෙන් ඉල්ලා ඇත.

අනුර ප්‍රදිප්