ශ්රී ලංකාවේ නිවාස ගැටලුවට තිරසාර විසඳුම් ලබාදීම සඳහා වූ ජාතික නිවාස වැඩසටහනට අවශ්ය මාර්ගෝපදේශ සැපයීම, තාක්ෂණික උපදෙස් ලබාදීම සහ පසු විපරම් කටයුතු සිදු කිරීම වෙනුවෙන් “ජාතික නිවාස මෙහෙයුම් කමිටුවක්” ස්ථාපිත කිරීමට අමාත්ය මණ්ඩල අනුමැතිය හිමිව තිබේ. නිවාස, ඉදිකිරීම් සහ ජලසම්පාදන අමාත්යාංශය විසින් ඉදිරිපත් කරන ලද මෙම යෝජනාව හරහා විවිධ ආයතන යටතේ විසිරී පවතින නිවාස ව්යාපෘති ඒකාබද්ධ ජාතික වැඩපිළිවෙලක් යටතට ගෙන ඒමට අපේක්ෂිතය.
2024 වසරේ සිදු කරන ලද ජන හා නිවාස සංගණනයට අනුව මෙරට ජනගහනයෙන් සැලකිය යුතු පිරිසකට නිවාස නොමැති බව අනාවරණය වී ඇති අතර, විශේෂයෙන්ම අඩු ආදායම්ලාභී ජනතාව, වතු ප්රජාව, ධීවර ජනතාව සහ නාගරික නිවාස අහිමි පිරිස් මෙම ගැටලුවට දැඩි ලෙස මුහුණ දී සිටිති. මෙම නව මෙහෙයුම් කමිටුව හරහා වර්තමාන නිවාස ප්රතිපත්තිය පාරිසරික සුරක්ෂිතතාව සහ සාමාජීය අන්තර්කරණය වැනි නවීන මූලධර්ම මත පදනම්ව යාවත්කාලීන කිරීමට ද නියමිතය.
2026 වර්ෂය සඳහා නිවාස ඉදිකිරීම් කටයුතු වෙනුවෙන් රජය රුපියල් බිලියන 100කට ආසන්න අතිවිශාල මුදලක් වෙන් කර තිබේ. එම ප්රතිපාදන වඩාත් ඵලදායී ලෙසත්, ප්රශස්ථ මට්ටමිනුත් ජනතාව වෙත ළඟා කරවීම තහවුරු කිරීම මෙම කමිටුව පිහිටුවීමේ ප්රධාන අරමුණකි. අමාත්යාංශ, පළාත් සභා මෙන්ම රාජ්ය නොවන සංවිධාන මගින් ක්රියාත්මක කරන විවිධ නිවාස වැඩසටහන් අතර පවතින සම්බන්ධීකරණ ගැටලු විසඳීමට ද මෙමගින් අවස්ථාව සැලසේ.
