යුක්රේනයට එරෙහිව රුසියානු හමුදාවන් සමඟ එක්ව සටන් කළ කැමරූන් ජාතිකයන් 16 දෙනෙකු ජීවිතක්ෂයට පත්ව ඇති බව රුසියානු බලධාරීන් තහවුරු කර ඇතැයි කැමරූන් රජය නිල වශයෙන් ප්රකාශ කර තිබේ. මධ්යම අප්රිකානු රටක් වන කැමරූනය සිය රටවැසියන් මෙම යුද්ධයට සම්බන්ධ වී ඇති බව පිළිගත් පළමු අවස්ථාව මෙය වන අතර, මියගිය පුද්ගලයන්ගේ පවුල්වල සාමාජිකයන්ට එරට විදේශ අමාත්යාංශය හා සම්බන්ධ වන ලෙස දැනුම් දී ඇත. රුසියාව විසින් මෙම යුද්ධය හැඳින්වීමට භාවිතා කරන “විශේෂ හමුදා මෙහෙයුම් කලාපය” තුළ මොවුන් “හමුදා කොන්ත්රාත්කරුවන්” ලෙස කටයුතු කර ඇති බව රාජ්ය තාන්ත්රික වාර්තාවල සඳහන් වේ.
කෙසේ වෙතත්, මෙම පුද්ගලයන් 16 දෙනා රුසියානු හමුදාවට බැඳුණේ කෙසේද යන්න හෝ ඔවුන් මියගිය ස්ථානය සහ තත්ත්වයන් පිළිබඳව මෙතෙක් නිශ්චිත තොරතුරු අනාවරණය වී නොමැති බව වාර්තා වේ. යුක්රේනය විසින් පසුගිය පෙබරවාරි මාසයේදී ප්රකාශ කළේ අප්රිකානු ජාතිකයන් 1,700 කට වැඩි පිරිසක් රුසියාව වෙනුවෙන් සටන් කරන බවයි. නමුත් දේශපාලන විශ්ලේෂකයන් පවසන්නේ සැබෑ සංඛ්යාව මීට වඩා බෙහෙවින් වැඩි විය හැකි බවයි. මෙම පුවතත් සමඟ අප්රිකානු තරුණයන් විදෙස් යුද ගැටුම් සඳහා බඳවා ගැනීමේ ප්රවණතාව පිළිබඳව ජාත්යන්තරයේ දැඩි අවධානයක් යොමුව තිබේ.
