කැනඩාවට ඇතුළු වීම සඳහා හෝ එරට රැඳී සිටීම සඳහා ව්යාජ ලේඛන ඉදිරිපත් කරන පුද්ගලයන්ට වසර පහක කාලයකට කැනඩාවට ඇතුළු වීම තහනම් කරන බව එරට ආගමන විගමන දෙපාර්තමේන්තුව (IRCC) අද (01) නිල වශයෙන් දැනුම් දුන්නේය. වීසා උපදේශකවරුන් සහ ඒජන්තවරුන් විසින් සිදු කරනු ලබන වංචනික ක්රියාවලට හසු නොවන ලෙස ද මෙහිදී අයදුම්කරුවන්ට උපදෙස් දී තිබේ.
වීසා අනුමත කිරීම් වේගවත් කර දෙන බවට හෝ අයදුම්පත්වල පවතින ගැටලු විසඳා දෙන බවට පවසමින් වංචාකරුවන් මුදල් ලබා ගැනීමට උත්සාහ කරන බව IRCC ආයතනය පෙන්වා දෙයි. කිසියම් අයදුම්කරුවෙකු ව්යාජ ලේඛන ඉදිරිපත් කර ඇති බව තහවුරු වුවහොත්, ඔවුන්ට වසර පහක් යනතුරු කැනඩාවට ඇතුළු වීමට හෝ එහි රැඳී සිටීමට නීතිමය වශයෙන් අවස්ථාවක් හිමි නොවේ.
වැඩ බලපත්ර (Work Permits), අධ්යයන බලපත්ර (Study Permits) සහ දේශපාලන රැකවරණ (Asylum) යන සියලුම වීසා කාණ්ඩ යටතේ ඉදිරිපත් කෙරෙන ලේඛන පරීක්ෂා කිරීමේ කටයුතු කැනඩා රජය විසින් මේ වන විට දැඩි කර ඇත. විශේෂයෙන්ම ජාත්යන්තර ශිෂ්ය වීසා වැඩසටහන්වල පවතින දෝෂ සහ වංචා අවම කිරීම සඳහා විගණකාධිපතිනිය විසින් ලබා දුන් වාර්තාවකට අනුව මෙම දැඩි පියවර ගෙන තිබේ. එබැවින් වීසා අයදුම් කිරීමේදී අව්යාජ ලේඛන පමණක් ඉදිරිපත් කරන ලෙසත්, කිසියම් වංචාවක් පිළිබඳ තොරතුරු දන්නේ නම් ඒ පිළිබඳව වහාම බලධාරීන් දැනුවත් කරන ලෙසත් කැනඩා රජය ඉල්ලා සිටියි.
